स्वनिगःया अप्वःथें सवारी साधन प्रदूषण जांचय् फेल

येँ – स्वनिगलय् चले जुइगु अप्वःथें सवारी साधन प्रदूषण जांचय् असफल जूगु सीदुगु दु । महानगरीय ट्राफिक प्रहरी महाशाखां स्वनिगलय् संचालन जुइगु सवारी साधनया प्रदूषण अनुगमन वा जांच याःगु इलय् अप्वःथें सवारी साधन प्रदूषणय् असफल जूगु सीदुगु खः ।

महाशाखां स्वनिगःया ट्राफिक व्यवस्थापन व सवारी साधनपाखें जुइगु प्रदूषण नियन्त्रणया निंतिं अभियान न्ह्याकेगु झ्वलय् उकथं सवारी साधन प्रदूषण जांच फेल जूगु खने दुगु खः । महाशाखालिसें यातायात व्यवस्था विभाग, सवारी परीक्षणया मंकाः पुचलं यातायातया साधनया जांच याःगु खः ।

महाशाखां वंगु चैत २१ निसें याःगु सवारी प्रदूषण जांचया झ्वलय् १,३२४ गः सवारी साधनया प्रदूषण अनुगमन व जांच याःगुलिइ ६७० गः सवारी साधन फेल जूगु खने दुगु खः । महाशाखाया प्रमुखलिसें वरिष्ठ प्रहरी उपरीक्षक वसन्तकुमार पन्तं स्वनिगलय् चले जुइगु अप्वःथें सवारी साधन प्रदूषण जांचय् फेल जूगु खँ धयादिल ।

महाशाखां सवारी परीक्षण ज्याकू टेकुया सहकार्यय् सतकय् सवारी प्रदूषणया जांच याना वयाच्वंगु दु । लिसें महाशाखां सवारी साधनया प्रदू
षण जांचलिसें करिडोर चायेकेगु, जेब्रा क्रसिङ व आकाशे ताँया निर्माण यायेगु ज्या नं याना वयाच्वंगु दु । यातायात व्यवस्था विभागयाकथं देय्न्यंकं ३२ गू लाखमध्ये १० गू लाखं मल्याक सवारी साधन स्वनिगलय् जक संचालन जुया वयाच्वंगु दु ।