नेपाल साहित्य मन्दिरपाखें थीथी सिरपाःया घोषणा

ख्वप- नेपाल साहित्य मन्दिरं दँय्दसं बिया वयाच्वंगु थीथी सिरपाःया घोषणा याःगु दु । ख्वपया हे दकलय् पुलांगु संस्थापाखें साहित्य, समालोचना व संगीत ख्यलय् योगदान बियादीपिंत बिया वयाच्वंगु सिरपाःया घोषणा याःगु खः ।

संस्थापाखें थुगुसीया ‘जरिमैयाँ साखः लुमन्ति सिरपाः’ समालोचक, स्रष्टालिसें संस्कृतिविद् डा. चुन्दा वज्राचार्य (येँ)यात लःल्हाइगु जूगु दु । अथे हे ‘कुमार साखः लुमन्ति हःपाः सिरपा दिलबहादुर चित्रकार ‘तुयु पुं’ (यल)यात लःल्हाइगु जूगु दु ।

थुकथं हे ‘आरबी जोशी फाउण्डेसन प्राज्ञ सम्मान’ जीवंकाःछि साहित्य, संस्कृतिया ख्यलय् थःत फ्यानादीम्ह समालोचक, च्वमि, संस्कृतिविद् फणिन्द्ररत्न वज्राचार्ययातच लःल्हायेगु संस्थां जानकारी बिउगु दु । थ्व स्वयां न्ह्यः थुगु सम्मान वाङ्मय शताब्दीपुरुष डा. सत्यमोहन जोशी व मदुम्ह प्रा. डा. जनकलाल वैद्ययात लःल्हायेधुंकूगु दु ।

थुकथं हेसंगीत ख्यलय् विशिष्ट योगदान बिया वयाच्वनादीपिंत स्वदँय् छक्वः लःल्हायेगु याना वयाच्वंगु ‘सुमनकुमार परदेशीस् लुमन्ति सिरपाः’ थुगुसी वरिष्ठ वाद्यगुरु श्रीगोपाल प्रजापति (मध्यपुर थिमि)यात लःल्हायेगु निर्णय जूगु संस्थाया नायः अगिव बनेपालीं जानकारी बियादीगु दु ।