पद्मरत्न हनाय् छगू दर्जन ज्याझ्वः

येँ – नेपाःया मानव अधिकार, आदिवासी जनजाति लिसें नागरिक आन्दोलनया न्ह्यलुवा भाजु पद्मरत्न तुलाधरया ज्याःजंक्व थीथी कथंया छगू दर्जन ज्याझ्वः यासें हनीगु जूगु दु ।

म्हिगः थन याःगु पत्रकार सम्मेलनय् हना ज्याझ्वः समितिया कजि लक्ष्मीदास मानन्धरं थुकिया जानकारी बियादीगु खः।
पत्रकार सम्मेलनय् जानकारी बिउ कथं थुकिया लसताय् न्हापांगु ज्याझ्वः कथं थौं शुक्रवाः ‘नेपाःया मानव अधिकार आन्दोलनय् पद्मरत्न तुलाधरया भूमिका’ विषयय् विचार गोष्ठी जुइत्यंगु दु । थनया नेपाः ब्यांक्वेटय् न्हिनय् २ बजे उगु ज्याझ्वः जुइ । ज्याझ्वलय् दमननाथ ढुंगाना, लोककृष्ण भट्टराई, डा. गोपाल शिवाकोटीपिंसं न्ववानादी ।

अथे हे कन्हय् शनिवाः सुथय् ८ बजेथनया पर्यटन बोर्डया हलय् पत्रकारिताय् पद्मरत्न बारे परिचर्चा याइगु ग्वसाः दु । उकथं हे भाद्र १० गते आइतवाः थनया टंकेश्वरय् मुनाः थीथी थासय् यचुपिचु याइगु ग्वसाः दु । अथे हे भाद्र १५ गते शुक्रवाः ‘शान्ति प्रक्रियाय् पद्मरत्न तुलाधरया सहजीकरण बारे परिचर्चा याइगु ग्वसाः दु । थ्व ज्याझ्वलय् मूपाहां कथं पुलांम्ह प्रधानमन्त्री पुष्पकमल दाहाल प्रचण्ड झाइगु ग्वसाः दु ।
भाद्र २० गते बुधवाः कोपुण्डोलया सातोआकी भवनय् पद्मरत्न तुलाधरया साहित्यिक व्यक्तित्व बारे चर्चा एवं साहित्य वाचनया ज्याझ्वः दुसा भाद्र २२ गते शुक्रवाः नेपाल संवत् आन्दोलनय् पद्मरत्न तुलाधरया योगदान विषयय् विचार गोष्ठी याइगु जूगु दु ।

भाद्र २३ गते शनिवाः सुथय् बसन्तपुली खुल्ला हिदानया ज्याझ्वः दुसा वकुन्हु हे न्हिनय् पद्मरत्न तुलाधरं च्वयादीगु थीथी ख्यालः क्यनीगु सांस्कृतिक ज्याझ्वः दु ।

उकथं हे आदिवासी जनजाति आन्दोलन, नेवाः आन्दोलनय् वय्कःया भूमिका बारे नं बिस्कं बिस्कं गोष्ठी याइगु खँ दु ।
भाद्र २९ गते शुक्रवाः इच्छुक खलः पुचःपाखें वय्कःयात हनापौ देछायेगु ज्याझ्वः दुसा भाद्र ३० गते मू अभिनन्दन समारोह यायेगु ज्याझ्वः क्वःजिउगु दु ।

सम्बन्धित बुखँ

LEAVE YOUR COMMENTS