सिक्किमय् २० न्हु ताःहाकःगु नेवाः कार्यशाला

येँ – भारतया सिक्किमय् २० न्हु तक न्ह्याःगु नेवाः कार्यशाला नकतिनि क्वचाल । नेवाः जातिया भाषा, नसात्वँसा हुलाप्याखं स्यनेगु ताः तयाः उगु कार्यशाला न्ह्याःगु खः । ज्याझ्वःया अन्तिम न्हि कार्यशालाय् सहभागी जूपिंसं नेवाः नसात्वँसाया ब्वज्या लिसें हुलाप्याखं न्ह्यब्वयेगु ज्या जूगु खः ।

कार्यशाला सिक्किमया सिङ्ताम धाःगु थासय् जूगु खः । उकी सिङ्ताम दुने व पिने च्वंपिं समेत यानाः २६ म्ह दुजःतय्सं सहभागीतय्सं ब्वति काःगु खः । ज्याझ्वः सिङ्तामया नेवाः भाय् ब्वनेकुथिया ग्वसालय् जूगु खः । थुकी नेपाःया नेवाः देय् दबूपाखें झाःम्ह लक्ष्मी शाक्यं सहभागीतय्त नेवाः हुलाप्याखं व नसात्वँसा दयेगु कला स्यनादीगु खः ।

अथे हे कालिम्पोङया योगवीर शाक्यं २० न्हु तकं नेवाः भाय् स्यनादीगु खः ।ज्याझ्वःया समापन समारोह नेवाः भाय् ब्वनेकुथिया नायः विनोद प्रधानं लसकुस यासें न्ह्याकूगु खःसा छ्यांज्ये अजित प्रधानं ज्याझ्वःया प्रतिवेदन न्ह्यब्वयादीगु खः । ज्याझ्वलय् पूरा दिन हे उपस्थित जुयादीम्ह अनमोल प्रधानयात विशेष सम्मान याःगु खःसा प्रशिक्षकपिंसं नेवाः भाय् व संस्कृतिया महत्व बारे कनादीगु खः ।

सम्बन्धित बुखँ

LEAVE YOUR COMMENTS