चम्पादेवीइ विहार दयेकेत सम्झौता

किपू- किपू नगरपालिका वडा नं. ४ स्थित चम्पादेवीइ बुद्ध मूर्ति पलिस्थालिसें विहार निर्माण याइगु जूगु दु । बौद्ध राष्ट्र थाइल्याण्डया छगू संस्थाया ग्वाहालिइ चम्पादेवीइ भगवान गौतम बुद्धया १०८ फिट तजाःगु मूर्ति थापनालिसें विहार दयेकेत्यंगु खः ।

थाइ संस्था थम्मचोटमँखोल फाउण्डेशनया ग्वाहालिइ ‘बुद्ध उद्यान फ्रासाई थाई नेपाल’ नांया विहारया निंतिं आवश्यक जग्गा किपू नगरपालिकां उपलब्ध याइगु जूगु दु । बुद्ध मूर्ति व विहारया निंतिं आवश्यक जग्गा उपलब्ध याकेगु विषयय् छगू सम्झौता नं
जुइधुंकूगु दु ।

किपू नगरपालिका व थम्मचोटमँखोल फाउण्डेशन निगू पक्षया दथुइ जूगु सम्झौता नगरपालिकापाखें नगर प्रमुख रमेश महर्जन व फाउण्डेसनपाखें प्रमुख कार्यकारी अधिकृत प्लोयथोनग्लोम्पेच थम्मचोटमँखोलं ल्हाःचिं तयादीगु खः ।
नगरपालिकापाखें उपलब्ध याकीगु जग्गाय् बुद्ध जीवनलिसें बौद्ध धर्मावलम्बितय् निंतिं अतिकं महत्वं जाःगु प्यंगू प्रमुख तीर्थ लुम्बिनी, बोधगया, सारनाथ व कुशीनगरया प्रतीकलिसें विहार, ध्यान केन्द्र व बुद्ध मूर्तिया क्वसं उपोसथ हल नं निर्माण यायेगु सम्झौता पती न्ह्यथनातःगु दु ।

बुद्ध मूर्ति व विहार निर्माणं नेपाः व थाइल्याण्डया दथुइ दुगु मैत्री सम्बन्ध अझ क्वातुइगु व विहार लागाया् आन्तरिक व धार्मिक पर्यटकीय गतिधिवि अप्वइगु विश्वास याःगु दु ।

सम्झौता पती ल्हाःचिं तयेगु ज्याझ्वलय् नगर उपप्रमुख सरस्वती खढ्का रिजाल, ४ वडा सदस्य सुरेन्द्र खनाल, नगरपालिका व फाउण्डेसनया नेपाल प्रतिनिधिया उपस्थिति दुगु खः ।