जयबागेश्वरीइ ने.संं. ७६४ या ताम्रपत्र लुल

येँ – अतिकं महत्वपूर्ण पुरातात्विक हलंज्वलं लुया वःगु कारणं चर्चाय् वयाच्वंगु ग्वल (पशुपति क्षेत्र) या जयबागेश्वरी देगः दुने हानं मेगु छगू महत्वपूर्ण अभिलेख लुया वःगु दु । अन दुने ने.सं ७६४ या छगू ताम्रपत्र लुया वःगु खः । आः तक अप्रकाशित उगु ताम्रपत्र कथं थनिं ३७५ दँ न्ह्यः हे अन जयबागेश्वरीया थ्व देगः बांलाक धस्वायेधुंकूगु खनेदु ।

देगः दुने भुजिंम्वः लिपिं च्वयातःगु ताम्रपत्र लुया वयेवं स्थानीय सम्पदाप्रेमितय्सं लिपि विशेष शरद कसाःयात अन ब्वनाः ताम्रपत्र ब्वनेगु ज्या याःगु खः । उकी स्थानीय रुक्मणी वैद्यनी धाःम्ह मनुखं जयबागेश्वरी द्यःयात लुँया मुकुट, वहःया थीथी तिसा लिसें देगलय् पताः समेत छाःगु खँ न्ह्यथनातःगु दु । छुं जुयाः द्यःयात छाःगु थ्व हलंज्वलं उखेथुखे जुल धाःसा न्याम्ह विशेष मनूत च्वनाः थुकिया संरक्षण यायेमाल धकाः नं उकी च्वयातःगु दु ।

देगः दुने लुया वःगु थुकथंया ऐतिहासिक अभिलेखतय्सं यानाः जयबागेश्वरी द्यःया महत्वया अझ थहां वंगु खँ स्थानीय सम्पदाविद् लिसें भाषिक कार्यकर्ता जलद वैद्यं कनादिल । थ्व स्वयां न्ह्यः अन देगः दुने हे मेगु देगःया गजू लुया वःगु खः । वयं लिपा हानं अंगलय् च्वयातःगु अतिकं पुलांगु किपात नं लुया वःगु खः । देगः जीर्णोद्धारया लागिं थुनेगु ज्या जूबलय् थुकथंया ज्वलंत लुयावःगु खः । पशुपति विकास कोषं थ्व हलंज्वलंयात वास्ता मयासे देगः थुनेगु कुतः याःसां स्थानीय मनूत व थीथी सम्पदाविद्तय्सं धाःसा थ्व सामग्रीया नं संरक्षण जुइमाःगु बिचाः तयेगु याना हयाच्वंगु दु । देगःया बारे यक्व प्रचार जुयाः यक्व मनूत वयाः अन लाथेपाथे किपा कायेगु ज्या याःगुलिं पशुपति विकास कोषं अन फोटो खिचे यायेत प्रतिबन्ध तःगु दु ।