लुँया भावय् अमेरिकी अर्थतन्त्रया लिच्वः

येँ – अमेरिकी फेडरेल बैंकं ब्याजदर म्हो यायेगु निर्णय यायेवं अन्तर्राष्ट्रिय बजारय् लुँया भाः थहां वनाः हानं न्हूगु रेकर्ड कायम जूगु दु । अमेरिकी बैंकं अमेरिकाया आर्थिक अवस्था बांलाना वयाच्वंगु व बन्द मार्केटय् बियातःगु ब्याजदरया भाः क्वकायेगु निर्णय याःगु खः । लिसें अमेरिकी बैंकं मुद्रास्फीति २ प्रतिशतया हाराहारी कायम जूगुलिं यानाः नं बैंकया ब्याजदर म्हो यायेगु निर्णय यायेवं उकिया लिच्वः लुँया बजारय् लाःगु खँ नेपाल सुनचाँदी व्यवसायी महासंघया पुलांम्ह अध्यक्ष लिसें बजाः विश्लेषक तेजरत्न शाक्यं ‘नेपालभाषा टाइम्स’ यात कनादीगु दु ।

म्हिगः अन्तर्राष्ट्रिय बजारय् लुँ प्रतिऔंश २०८५.८० डलर कायम जूगु खःसा नेपालय् लुँ तोलां १ लाख २२ हजार तका कायम जूगु खः । म्हिगः जक नेपालय् लुँ तोलां १३०० तका थहां वंगु खः ।

अमेरिकी फेडरल बैंक वइगु सोमवाःनिसें ब्याजदर म्हो याये फइगु अनुमान जुयाच्वंगु दु । फेडरेल बैंक सन् २०२४ या शुरुवातय् ब्याजदर म्हो यायेगु निर्णय याःगु खः । फेडेरल बैंकं ब्याजदर म्हो यायेगु प्रस्ताव याःगु इलय् नं लुँया भाः थहां वंगु खःसा आः उकियात कार्यान्वयन यायेगु निर्णय यायेवं नं लँुया भाः थहां वंगु खँ शाक्यं धयादीगु दु ।

उकथं हे थौंकन्हय् अमेरिकाय् रियल स्टेटया व्यापार म्हो जूगुलिं यानाः नं लगानीकर्तात लुँइ लगानी यायेत आकर्षित जूगुलिं लुँया भाः थहां वंगु खँ नं वय्कलं धयादीगु दु ।
थ्व स्वयां न्ह्यः सन् १९९८ पाखे नं अमेरिकी फेडरल बैंकं ब्याज क्वकाःगु खः । तर उगु इलय् ब्याजदर कुहां वःथें लुँया भाः नं कुहां वयेगु यानाच्वंगु खः । तर आः धाःसा ब्याजदर म्हो जूसां नं लुँया भाः थहां वनाः अःखः बजाः न्ह्यानाच्वंगु दु ।

सन् २००२ सं अमेरिकी फेडेरल बैंकं ब्याजदर क्वकयाः ०.२५ तक कायम याःगु खःसा उगु इलय् लुँया भाः अन्तर्राष्ट्रिय बजारय् २५८ डलर तक कुहां वःगु खः । उगु इलय् विश्वया आपालं लुँ उद्योग तकं बन्द जूगु खँ नं वय्कलं कनादिल ।

सन् १९९८ निसें २००२ तक अन्तर्राष्ट्रिय लुँ बजारय् चिनियाँत तक दुहां मवःनि । सन् २००४ लिपा धाःसा चीनं नं अन्तर्राष्ट्रिय लुँया बजारय् चिउताः प्वंकेगु यायेवं लुँया भाः निरन्तर रुपं थहां वनाच्वंगु दु । सन् २००४ लिपा हरेक दँय् लुँया भाः १०० डलरं थहां वनाच्वंगु दु । अन्तर्राष्ट्रिय बजारय् चिनियाँ बैंकं लुँ न्यायेगु क्रम अप्वयेका यंकेवं लुँया भाः विश्व बजारय् निरन्तर रुपं थहां वनाच्वंगु दु ।

बजाः विश्लेषक शाक्यया कथं सन् २०११ य् अमेरिकाया ट्वीन टावरय् हमाल जूगु इलय् नं लुँया भाः कुहां वःगु खः । उगु इलय् १३०० डलर प्रतिऔंश कायम जुयाच्वंगु लुँया भाः कुहां वयाः छक्वलं १००० डलर तक थ्यंगु खः ।

सम्बन्धित बुखँ

LEAVE YOUR COMMENTS