आः पेट्रोल पम्पया नापनापं विद्युत चार्जिङ स्टेशन

येँ – विद्युतीय गाडीया लागिं नेपाल आयल निगमं आः पेट्रोल पम्पया नापनापं चार्जिङ स्टेशन नं तइगु जूगु दु । निगमं नेपाल विद्युत प्राधिकरणया ग्वाहालिइ पेट्रोल पम्पय् चार्जिङ स्टेशन तयेगु निंतिं तयारी यानाच्वंगु खः । सरकारं आः ३०० गः विद्युतीय गाडी स्वनिगलय् चले यायेत्यंगु दु ।

अथेहे प्राधिकरणं नं वा वइगु इलय् उत्पादन जुइगु फुक्कं मत खपत जुइ मखु धासें विद्युतीय गाडीया निंतिं चार्जिङ स्टेशन दयेकेगु तयारी यानाच्वंगु दु । वइगु दँया कार्तिकय् ४५६ मेगावाटया माथिल्लो तामाकोशी जलविद्युतं मत उत्पादन जुइगु व थुकिया फुक्कं मत खपत मजुइगु जूगुलिं विद्युत खपत अप्वयेकेगु योजना प्राधिकरणं दयेकाच्वंगु खः ।

उकिं निगमं चार्जिङ स्टेशन तयेगु थाय्या अध्ययन यानाच्वंगु दु । न्हापांगु चरणय् स्वनिगःया ७० गू पेट्रोल पम्पय् चार्जिङ स्टेशन तयेगु निंतिं अध्ययन जुयाच्वंगु दु । निगूगु चरणय् स्वनिगः जःखः यानाः २०० गू पेट्रोल पम्पय् चार्जिङ स्टेशन तयेगु तयारी निगमं यानाच्वंगु दु । निगमं चितवनंनिसें थानकोट तकया पेट्रोल पम्पय् चार्जिङ स्टेशन तयेत्यंगु दु ।

पेट्रोल पम्प बाहेक खाली थासय् नं चार्जिङ स्टेशन तइगु ग्वसाः दु । मेखे विद्युत प्राधिकरणं येँ व यल महानगरपालिका लिसे सहकार्य यानाः झिगू थासय् तत्काल चार्जिङ स्टेशन तयेगु तयारी यानाच्वंगु दु । थौंकन्हय् प्राधिकरणया केन्द्रीय ज्याकू रत्नपार्कय् चार्जिङ स्टेशन सञ्चालन जुयाच्वंगु दु । अथेहे सिंहदरवार दुने व ज्ञानेश्वरय् नं छगू चार्जिङ स्टेशन तयातःगु दु ।

नेपालय् विद्युतीय सवारी साधन चले यायेगु ज्या सफल जुल धाःसा पेट्रोलियम पदार्थ आयात प्रतिस्थापन यानाः बजेट घाटा म्हो जुइगु आशा जुयाच्वंगु दु । नेपाःया आयातय् दकलय् अप्वः थाय् पेट्रोलं कयाच्वंगु दु । विद्युतीय गाडीया खर्च नं पेट्रोलियम पदार्थ स्वयां ८० प्रतिशत कम दु । १ लिटर पेट्रोलं २० किलोमिटर यात्रा यायेफइसा विद्युतीय गाडीइ १५० निसें २०० तकां ८० किलोमिटर तक यात्रा यायेफइ ।