ने. सं. ११४४ कौलाथ्व पारू - नःलास्वनेगु

च्वमि ज्ञानकाजी मानन्धर मंत

भ्वँत (नेपालभाषा टाइम्स)( नेपालभाषाया च्वमि, संस्कृतिविद्, शिक्षाविद् लिसें भ्वँतया नांजाःम्ह समाजसेवी ज्ञानकाजी मानन्धर मंत । ताः ई न्ह्यवंनिसें जलस्येँया ल्वचं कयाः उसाँय् मदयाच्वंम्ह वय्कः थौं सुथय् भ्वँतया थःगु हे छेँय् मदुगु खः । वय्कः ८९ दँ दुम्ह खः ।

भ्वँतया कला, संस्कृति व सम्पदाया बारे अध्ययन यानाः वय्कलं तःगू सफू च्वयादीगु दु । अथे हे वय्कलं भ्वँतया थीथी धार्मिक, सांस्कृतिक बाखंयात नाट्य रुपान्तरण यानाः नाटक सफू नं च्वयादीगु दु । कपिलवस्तुस भगवान्, कुमारी, खड्गजोगिनी, बनेपा स्तवन, अरनिकोया श्वेतचैत्य, मानन्धरतय्गु विषय छुं खँ वय्कःया नांजाःगु सफूत खः । अथे हे वय्कलं अंग्रेजी भासं ‘द लिजेण्ड अफ नेपाल’ नांगु सफू नं च्वयादीगु दु ।

वय्कलं भ्वँतया चण्डेश्वरी, येँया कुमारी, ख्वपया नवदुर्गा, पन्तिया इन्द्रेश्वर महाद्यः, किपूया बाघभैरव, गोर्खाया गोरखनाथ आदि बारे नं अनुसन्धान यानाः च्वसुत च्वयादीगु दु ।

भ्वँतय् थीथी स्कुल व कलेज स्थापना यानाः शिक्षाया जग बल्लाकादीम्ह वय्कलं तःदँ तक थम्हं नं अंग्रेजी विषय ब्वंकादीगु खः ।
वय्कः केन्द्रीय मानन्धरया पुलांम्ह केन्द्रीय दुजः खःसा मानन्धर संघय् वय्कलं सिरपाः नं नीस्वनादीगु दु । भ्वँतय् वय्कःया अबु मोहनलाल खिं मानन्धर नं थःगु ईया नांजाःम्ह नाट्यकर्मी एवं संस्कृतिह्यमि खः ।

मदुम्ह मानन्धरया अन्त्येष्टि थौं हे भ्वँतय् यायेत्यंगु दु । वय्कः जहान लिसें निम्ह काय व निम्ह म्ह्याय् दी ।