किपू तःधंख्यलय् बुद्ध मूर्ति पलिस्था

किपू – किपू नगरपालिका वडा नं ९ तःधंख्यलय् शाक्यमुनि भगवान गौतम बुद्धया मूर्ति पलिस्था याःगु दु । उगु मूर्ति दाता त्रिरत्न महर्जनया छेँ कलंकीनिसें शोभा यात्रा यानाः किपूया हे तांल्चाय् तक हःगु खः ।किपू, नगां, पांगा व किपूया जःखः च्वंपिं आपालं भिक्षु, अनागारिका, उपासक उपासिका व श्रद्धालुपिनिगु सहभागिता तांल्चांनिसें सांस्कृतिक बाजंसहित छगू शोभा यात्रा यानाः तःधंख्यलय् हयाः पलिस्था याःगु खः ।

तःधंख्यः संरक्षण तथा टोल सुधार समितिया कुतलय् थनिं दछि न्ह्यः स्वांयाःपुन्हिकुन्हु बुद्ध मूर्ति पलिस्थाया निंतिं शिलान्यास यायेगु ज्या जूगु खःसा उगु इलंनिसें हे बुद्ध मूर्ति दयेकेगु ज्या नं न्ह्याःगु खः । बुद्ध मूर्ति पलिस्था ज्याझ्वलय् येँ क्षेत्र नं. १० या प्रतिनिधिसभा सदस्य राजन केसीं सांसद विकास कोषपाखें थम्हं न्हापा बियागु बचंकथंया न्हय्गू लाख तकालिसें वइगु बजेटपाखें स्वंगू लाख थप यानाः झिगू लाख तका बीगु बचं बियादिल ।

प्रदेश नं. ३ या सांसद पुकार महर्जनं ज्या यायां वनेबलय् छुं मगाः मचाः दुसा उकियात कयाः ग्वाहालि यायेगु बचं बियादिल । ज्याझ्वलय् किपू नगरपालिकाया प्रमुख रमेश महर्जन, उपप्रमुख सरस्वति खड्का, किपू नगरपालिका वडा नं. ९ या वडाअध्यक्ष गंगाराम महर्जनं नं थःथःगु नुगःखँ तयादीगु खः ।

भिक्षु भद्दियपाखें शिल प्रार्थना यासें न्ह्याःगु ज्याझ्वलय् मूर्ति पलिस्थाया निंतिं विशेष ग्वाहालि यानादीपिं शाक्य कीर्ति विहार, सतुंगःया प्रमुख पुण्यवति गुरुमां नं बौद्ध बाखं कनाबिज्याःगु खः ।

समितिया नायः बलराम महर्जनया सभापतित्वय् न्ह्याःगु ज्याझ्वलय् नगरमण्डप श्रीकीर्ति विहारया मीना गुरुमां, कीर्तिपुर–चन्द्रागिरि नगरपालिका ज्ञानमाला भजन खलःया क्षेत्रीय नायः जुलुम शाक्य लगायतपिनिगु उपस्थिति दुगु खः । यलया ग्वार्कोय् दयेकूगु उगु मूर्ति यलया हे कलाकार जयराज वज्राचार्यं दयेकादीगु खः ।