किपूया युद्ध पार्क निर्माणया अन्तिम चरणपाखे

किपू -किपू नगरपालिका वडा नं. १ व १० दुने किपू नगरपालिकां दयेकाच्वंगु ऐतिहासिक युद्ध पार्कया निर्माण अन्तिम चरणय् थ्यंगु दु । आः याकनं हे थुकिया उलेज्या यायेगु तयारी समेत जुयाच्वंगु खँ किपू नगरपालिकाया मेयर रमेश महर्जनं कनादीगु दु ।

किपू नपाया ५४ रोपनी जग्गाय् विस्तार जुयाच्वंगु थ्व पार्कया स्वरुप धाःसा न्हापा यानातःगु डिजाइन स्वयां छुं भचा पाकागु खँ नं मेयर महर्जनं कनादिल । न्हापा तःधंंगु एरिया दुने यक्व संरचनात दयेकेगु कथं डिजाइन याःगु जुयाः अर्बौं तकाया लागत पिहां वःगु खः । तर आः धाःसा पार्कय् यक्व संरचना निर्माण मयासे हरियाली यक्व दयेकेगु कथंया डिजाइन तयार यानागु खँ नं वय्कलं कनादिल ।

उगु पार्कय् तयेगु लागिं युद्धया लु खने दइगु आपालं मूर्तित नं दयेका तःगु दुसा आः थ्व मूर्तित तयेगु लागिं अन चिचीजाःगु थां नं दयेकाच्वंगु दु । अथे हे पार्कय् वनेगु तँ नं दयेकाच्वंगु दु । थ्व पार्क दयेकेगु लागिं येँ महानगरपालिकापाखें नं मेयर विद्यासुन्दर शाक्यं ग्वाहालि चूलाकादीगु खः ।

गोर्खाया जुजु पृथ्वीनारायण शाहं किपुली न्हापांगु आक्रमण याःबलय् थ्वहे पार्क लागाय् मू युद्ध जूगु खः । थ्व हे पार्कया नापसं च्वंगु छगः ल्वहँतय् गोर्खाया सेनापति कालु पाण्डेयात किपूमितय्सं स्याना बिउगु खः । थ्व ल्वहंयात थौंकन्हय् छ्याकः ल्वहं धायेगु याः । थ्व थासय् नगर सुरक्षाया लागिं अबलय् दयेकातःगु पःखाःया अवशेष नं अझं ल्यं दनि ।