येँ मनपापाखें अपांगता परिचयपत्र कार्यविधि अनुमोदन
येँ – येँ महानगरपालिकां अपांगता जूपिनिगु निंतिं म्हसीका पौ वितरणसम्बन्धी कार्य विधि–२०७५ अनुमोदन याःगु दु । येँ मनपाया आः नकतिनि च्वंगु कार्यपालिकाया बैठकं थ्व सम्बन्धी निर्णय याःगु खः ।
येँ महानगरपालिका नगर कार्यपालिकाया ३० क्वःगु बैठकं पारित याःगु कार्यविधिइ अपांगता जूम्ह थः स्वयम वा अभिभावक वा संरक्षकमध्ये सुनां नं अपांगता जूगु पुष्टि जुइगु आवश्यक भ्वंसहित सम्बन्धित वडाय् निवेदन बी फइगु व वयां लिपा वडां सामाजिक विकास विभागय् सिफारिस यानाः विभागपाखें म्हसीका पौ उपलब्ध याकेगु व्यवस्था याःगु दु ।
अपांगता सम्बन्धी प्रमाणपत्र अर्थात म्हसीका पौ कायेत स्थायी ठेगाना दुगु थासय् तक वने मफइगु अवस्थाय् वा अज्याःम्ह व्यक्तिया हकय् थ्व स्वयां न्ह्यः अज्याःगु प्रमाणपत्र मकाःनिगु खः धइगु यकिन यानाः काये फइगु व्यवस्था यानातःगु दु ।
यदि थ्व सम्बन्धी छुं चित्त बुझे मजूगु खँ दुसा महानगरया उपप्रमुखया संयोजकत्वय् गठन यानातःगु समन्वय समितिइ निवेदन बी फइगु नं व्यवस्था यानातःगु दु । येँ मनपां याःगु व्यवस्थाकथं सामान्य अपांगता जूपिं धाःसा थः स्वयम हे उपस्थित जुयाः म्हसीका पौ कायेमाःगु व्यवस्था याःगु दु ।
थ्व हे झ्वलय् नगर कार्यपालिकाया उगु बैठकं महानगरपालिकाया आः च्वनीगु नगरसभाय् सार्वजनिक निजी साझेदारी, सार्वजनिक यातायात व सहरी योजना सम्बन्धी विधेयक प्रस्तुत यायेगु नं निर्णय याःगु दु । लिसें उगु हे बैठकं येँ महानगरपालिकाया प्रमुख विद्यासुन्दर शाक्यं रानीपुखू पुनःनिर्माणया निंतिं छगू उपभोक्ता समिति गठन यायेगु नापं समितिया दुजःपिनिगु नां नं प्रस्ताव यानादीगु खः ।
येँ मनपाया प्रवक्ता ईश्वरमान डंगोलं बियादीगु जानकारीकथं येँ मनपा प्रमुख शाक्यं समितिइ च्वनादीपिनिगु नां प्रस्ताव यानादीगु व उकियात बैठकं अनुमोदन याःगु जानकारी बियादीगु दु । अजयरत्न स्थापितया संयोजकत्वय् गठन जूगु समितिइ सचिवय् रोशनकाजी तुलाधर, कोषाध्यक्षय् होमप्रसाद खड्गी व दुजलय् दीपकराज तुलाधर व दीपेन्द्र खड्गी च्वनादीगु दु ।
थुकथं हे रानीपुखू पुनःनिर्माणया अनुगमन व समन्वय समिति नं गठन याःगु दुसा समितिइ वडा नं. १या वडाअध्यक्ष भरतलाल श्रेष्ठ, वडा नं. २७ या वडाअध्यक्ष चिनियामान वज्राचार्य व वडा नं. २८ या वडाअध्यक्ष भाइराम खड्गी च्वनादीगु दु ।
LEAVE YOUR COMMENTS