देय्न्यंकं ख्वाउँ मौसम शुरु

येँ – देय्न्यंकं ख्वाउँ मौसम शुरु जूगु दु । मनसुन पिहां वनेवं ख्वाउँया वयेगु शुरु जूगु खः । वंगु शनिवाःनिसें नेपालं मनसुन पिहां वनेवं स्वनिगःलिसें देय्न्यंकंया मौसम ख्वाउँ वनेगु शुरु जूगु खः ।मौसम पूर्वानुमान महाशाखायाकथं मनसुनया वायु पिहां वंगु लगत्तै हे न्यूनतम व अधिकतम तापक्रम नं कुहां वनेगु शुरु जूगु दु ।

नेपाःया वायुमण्डलय् पश्चिमी वायुया प्रभाव अप्वया वंलिसे चिकुलाया मौसम शुरु जुइगु महाशाखां न्ह्यथंगु दु । महाशाखां बिउगु जानकारीकथं पश्चिमी भू मध्यसागरपाखें उच्च वायु मण्डलय् न्यूनचापीय क्षेत्र जुयाः उत्पन्न जूगु सुपाँय् व अरब सागरपाखें उत्पन्न जूगु वायुया प्रभावया कारणं स्वनिगःलिसें देय्न्यंकं ख्वाँउ अप्वया वनीगु खः ।

महाशाखाया कथं लिपांगु इलय् स्वनिगःया न्यूनतम तापक्रम १४ दशमलव ५ डिग्री व अधिकतम तापक्रम २७ दशमलव ३ डिग्री सेल्सियस दु । देय्न्यंकंमध्ये दकलय् कम तापक्रम जुम्लाय् मापन याःगु दु । थनया तापक्रम न्युनतम ७ दशमलव ५ डिग्री सेल्सियस दुसा दकलय् अप्वः धनगढीया तापक्रम ३२ दशमलव ७ डिगी सेल्सियस जूगु महाशाखां न्ह्यथंगु दु ।