नेपाः राष्ट्रिय पार्टी खारेजविरुद्ध अन्तरिम आदेश

येँ – निर्वाचन आयोगं नेपाः राष्ट्रिय पार्टीयात खारेज याःगु विरुद्ध पार्टीं तःगु मुद्दाय् अन्तरिम आदेश जारी याःगु दु । सर्वोच्च अदालतय् पार्टी अध्यक्ष विजय सैंजु दर्ता याःगु रिटयात कयाः म्हिगः सुनुवाइया झ्वलय् न्यायाधीश ईश्वरीप्रसाद खतिवडाया एकल इजलासं निर्वाचन आयोगया निर्णय कार्यान्वयन मयायेत अन्तरिम आदेश जारी याःगु खः ।

म्हिगः नेपाः राष्ट्रिय पार्टीपाखें बहस यासें वरिष्ठ अधिवक्ता दिनेश त्रिपाठी व अधिवक्ता भरत लक्काई नेपाःया संविधानय् हे दल खारेज जुइ मखु धयागु प्रावधान दु धासें निर्वाचन आयोगया निर्णय बदरभागी जुइगु धकाः बहस यानादीगु खः । उकथं हे संविधानया भावना अःखः निर्वाचन आयोगं ल्ह्वंगु पलाः असंवैधानिक जूगु तर्क नं वय्कःपिंसं यानादीगु खः ।

बहस यायेगु झ्वलय्े अधिवक्तातय्संं कारोना संक्रमणया इलय् सरकारं हे नीन्याम्ह स्वयां अप्वः मनू मुने मते धकाः प्रतिबन्ध तयातःगु इलय् केन्द्रीय समितिया बैठक सःतेगु अवस्था मदुगुलिं यानाः पार्टीं बीमाःगु प्रतिवेदन बीत लिबाःगु कारणं जक पार्टी खारेज यायेगु उचित मजूगु तर्क नं तयादीगु खः । तर्क तयेगु झ्वलय् अधिवक्तातय्सं नेपाः राष्ट्रिय पार्टीया केन्द्रीय कमिटीइ न्यय्न्याम्ह स्वयां अप्वः दुगु व सरकारं कोरोना संक्रमणया कारणं यानाः नीन्याम्ह स्वयां अप्वः मुनेत प्रतिबन्ध तयातःगु धासें निर्वाचन आयोगया निर्णय बदर यायेमाःगु माग यानादीगु खः ।

सर्वोच्च अदालतं अन्तरिम आदेश जारी यायेवं नेपाःया राष्ट्रिय पार्टीया अध्यक्ष विजय सैजु धाःसा प्रारम्भिक जित जूगु प्रतिक्रिया बियादीगु दु । निर्वाचन आयोगं नेपाः राष्ट्रिय पार्टी लिसें ४२ गू पार्टीयात इलय् प्रतिवेदन बुझे मयाः धासें खारेज यानाबिउगु खः ।