आरक्षण विरोधी फैसला विरुद्ध आन्दोलन शुरु
येँ – आरक्षण सुविधाया सम्बन्धय् सर्वोच्च अदालतं याःगु फैसला विरुद्ध रुपन्देहीया उत्पीडित वर्ग आन्दोलित जूगु दु । थीथी राजनीतिक दललिसे स्वापू दुगु दलित व आदिवासी जनजाति संगठनं उत्पीडित वर्ग मंकाः संघर्ष समिति गठन यानाः आः सर्वोच्चया फैसला षड्यन्त्रपूर्ण जूगु द्वपं बिसें उकिया नितिं दवावमूलक आन्दोलन याइगु जूगु दु । लिसें उगु फैसला विरुद्ध कानुनी प्रक्रिया समेत न्ह्याकेगु घोषणा नं याःगु दु ।
डा. विनयकुमार पंजियारं आरक्षण सुविधा अन्तर्गत छात्रवृत्तिइ एमडी ब्वने दयेमाः धकाः बिउगु रिट निवेदनय् सर्वोच्च अदालतं आरक्षणया सुविधा जातीय आधारय् मखुसें वर्गीय व आवश्यकताया आधारय् जक बीमाःगु खः धासें आरक्षणया फाइदा ‘तरमारा वर्गं’ जक कयाच्वंगु दु धइगु तर्क सहित आरक्षणया विरोधये फैसला याःगु खः ।
संघर्ष समितिया संयोजक नेपाल हरिओम विकं नेपाःया संविधान २०७२ या प्रस्तावनाय् हे वर्गीय, जातीय, क्षेत्रीय, भाषिक, धार्मिक लैंगिक विभेद व फुक्कं कथंया जातीय छुवाछुतया अन्त्य यानाः आर्थिक समानता, समृद्धि व सामाजिक न्याय सुनिश्चित यायेत समानुपातिक समावेशी व सहभागितामूलक सिद्धान्तया आधारय् समाज दयेकेगु धकाः स्पष्ट रुपं च्वयातःगुलिं सर्वोच्च अदालतया थ्व फैसला संविधानया प्रस्तावनया हे अःखः जूगु खँ धयादीगु दु ।
उकथं हे संघर्ष समितिया सहसंयोजक शंकर गाहां सर्वोच्च अदालतया फैसलां ७० दँ न्ह्यवंनिसें न्ह्यानाच्वंगु आदिवासी जनजाति, मिसा, मुश्लिम व सिमान्तकृत समुदायया आन्दोलन, २०६२÷६३ सालया जनआन्दोलनं वःगु आरक्षणया सुविधायात लाकाकाःगु धासें सर्वोच्च फैसला विरुद्ध पुनरावलोकनय् वनेगु लिसें दवावमूलक आन्दोलन नं यायेगु खँ धाःगु दु ।
आरक्षणया अधिकार कटौती मयायेत माग यासें प्रदेशया मुख्यमन्त्री कुलप्रसाद केसीयात ज्ञापन पौ बीगु लिसें सरोकारवालालिसे अन्तक्र्रिया यायेगु ज्याझ्वः क्वःछिउगु दु ।
LEAVE YOUR COMMENTS