शिक्षासेवी पुरुषरत्न वज्राचार्य मंत

येँ – भाषासेवी, शिक्षासेवी पुरुषरत्न वज्राचार्य मंत । श्वासप्रश्वाससम्बन्धी ल्वचं कयाच्वंम्ह वय्कः नर्भिक अस्पतालय् वासः याकुयाकुं ७७ दँया वैंशय् मंगलवाः मदुगु खः । वय्कःया अन्त्येष्टि म्हिगः कर्णदीपय् जूगु दु ।

वय्कः अंग्रेजी विषयया प्राध्यापन याना वयाच्वनादीम्ह नांजाःम्ह शिक्षासेवी खः । सह–प्राध्यापक वज्राचार्यं शंकरदेव क्याम्पस व परोपकार आर्दश माध्यमिक विद्यालयय् ताःई तक अंग्रेजी ब्वंकादीगु खः । वय्कः नेपालय् उच्च शिक्षाया विकासया निंतिं सरकारं हःगु उच्च शिक्षा परियोजनाया संयोजक नं जुयादीधुंकूम्ह खःसा नेपाल प्रगतिशील प्राध्यापक संघया पुलांम्ह अध्यक्ष नं खः ।

वय्कः लुम्बिनी बौद्ध विश्व–विद्यालयया उपकुलपति हृदयरत्न वज्राचार्यया दाजु खःसा वय्कःया जहान, काय निम्ह व म्ह्याय् छम्ह दी ।