डब्लूएनओ इण्डियन च्याप्टरया न्हापांगु तःमुँज्या

येँ- वल्र्ड नेवाः अर्गनाइजेसन (डब्लूएनओ) इण्डियन च्याप्टरया न्हापांगु तःमँुज्या जुल । इण्डियन च्याप्टर तदर्थ समितिया नायः शिवप्रसाद (एसपी) प्रधानया सभापतित्वय् न्ह्याःगु ज्याझ्वःया उलेज्या मूपाहां संस्कृतिविद् गणेशराम लाछिं सुकुन्दाय् मत च्याकाः यानादीगु खः ।

भारतया पश्चिम बंगाल, आसाम, सिक्किम, अरुणाचल, मणिपुर, मेघालय, दिल्ली लगायत थीथी थासय् च्वनाच्वंपिं नेवाःतय् उपस्थिति दुगु तःमुँज्या दार्जिलिंगया तकदाह छाउनी पश्चिम बंगालय् जूगु खः ।
भारतया थीथी थासय् नेवाः भाय् व संस्कृति उत्थानया निंतिं योगदान बियादीगु धासें मूपाहां लाछियात दोसल्लां न्ययेकाः हनापौ लःल्हासें सम्मान ं याःगु खः ।

भारतया थीथी थासं प्रतिनिधित्व यानादीपिंसं थःथःगु नुगः खँ तयादीगु ज्याझ्वःया उलेज्या लिपा डब्लूएनओ इण्डियन च्याप्टरया न्हूधाः नं याःगु खः । न्हूधाःकथं न्हूगु ज्यासना पुचः एसपी प्रधानया हे अध्यक्षताय् गठन याःगु खः । स्वीखुम्हेसिया उगु ज्यासना पुचलय् इण्डियन च्याप्टरया संस्थापकपिं सकसितं दुजःकथं दुथ्याकाःगु जानकारी नं ज्याझ्वलय् बिउगु खः ।