बागमति सरकारयात नेवाः–तामाङया ज्ञापन

येँ – नेवाः देय् दबू व तामाङ घेदुङं भाषा आयोगया सिफारिस कथं बागमती प्रदेशय् नेपालभाषा व तामाङ भाषायात सरकारी ज्याखँया भाषाया रुपय् छ्यलेत माग यासें मुख्यमन्त्री राजेन्द्र पाण्डे व सभामुख सानु श्रेष्ठयात ज्ञापन पौ लःल्हाःगु दु ।

नेवाः देय् दबूया नायः नरेश ताम्रकारं लःल्हानादीगु उगु ज्ञापन पतिइ भाषा आयोगया सिफारिस कथं बागमती प्रदेशय् नेपालभाषा व तामाङ भाषायात ज्याखँया भाषाया रुपय् कार्यान्वयन यायेगु नितिं आवश्यक कानुन दयेकाः ज्या न्ह्याकेत माग यानातःगु दु । ज्ञापनपौ लःल्हाना कासें मुख्यमन्त्री पाण्डें नेवाः व तामाङ समुदायया मागयात सरकारात्मक रुपं कयागु व उकिया लागिं पहल यायेगु बचं बियादीगु खः । उगु इलय् कक्षा ९ निसें १२ तक मातृभाषायात ऐच्छिक विषय कथं विज्ञान व गणित थेंज्याःगु विषयलिसे ल्वाकछ्यानातःगुलिं अन भाषाया हे विषय तयेमाःगु खँय् ध्यानाकर्षण यायेगु ज्या नं जूगु खः । मुख्यमन्त्री पाण्डें प्रदेशय् ९ कक्षानिसें १२ कक्षा तक मांभाय् ब्वने दइगु व्यवस्था यायेत मुख्य सचिवयात आदेश तकं बियादीगु खः।

अथे हे प्रदेशसभाया सभामुख सानु श्रेष्ठं नं भाषा आयोगया सिफारिस लागू याकेगु खँयात सकारात्मक रुपं कयादीगु दुसा उपसभामुख राधिका तामाङं नं नेवाः व तामाङतय्गु माग कथं थम्हं भूमिका म्हितेगु बचं बियादीगु खः ।

बागमति प्रदेशया अर्थमन्त्री सालिक– राम जमरकटेलं सरकारया गठबन्धनं तयार याःगु न्यूनतम नीति तथा कार्यक्रमय् नं भाषा आयोगया सिफारिस कार्यान्वयन यायेगु खँ दुथ्याकागु दु धयादिल । सरकारं थुकिया हे आधारय् कानुन दयेकीगु खँ नं वय्कलं कनादिल ।

हेटौंडाय् वंगु उगु डेलिगेशनय् नेवाः देय् दबूपाखें नीस्वंगु बागमति प्रदेशय् नेपालभाषा कार्यान्वयन समितिया कजि नापं नेवाः देय् दबूया बागमति प्रदेश नायः उमेश स्थापित, देय् दबू प्रदेश उपाध्यक्ष (हेटौंडा) विष्णुलाल महर्जन, देय् दबूया बागमती प्रदेशया छ्याञ्जे नापं समितिया दुजः श्रीकृष्ण महर्जन, देय् दबूया बागमति प्रदेश समितिया दुजः राजेन्द्र रंजित, समितिया दुजःपिं रुक्साना कपाली, प्रसन्न डंगोल, विद्या चित्रकार व तामाङपाखें घेदुङया उपाध्यक्ष कुमार घिसिङ, महासचिव बाबु घिसिङ लगायतया दुजःत सहभागी जुयादीगु खः । उगु इलय् बागमति प्रदेशया उर्जामन्त्री बसन्त मानन्धर, सांसदपिं विराजभक्त श्रेष्ठ, प्रतिमा श्रेष्ठ, शोभा शाक्य, नरोत्तम बैद्य नापं तामाङ समुदायया थीथी सांसदपिंलिसे नं सहलह ब्याकूगु खः । अथे हे मेमेगु समुदायया सांसदपिंसं नं नेवाः व तामाङतय्गु थुगु मागयात सकारात्मक रुपं कयादीगु खः ।

सम्बन्धित बुखँ

LEAVE YOUR COMMENTS