
येँ- बुरांख्यः ल्याय्म्ह पुचःया ग्वसालय् वंगु शनिवाः बुरांख्यः उत्सवलिसें सांस्कृतिक ज्याझ्वः जुल । पुचःया ग्वसालय् वंगु शनिवाः थनया बुरांख्यलय् छन्हुया उगु उत्सव जूगु खः ।
येँ महानगरपालिकाया प्रमुख विद्यासुन्दर शाक्यं त्वाःदेवाय् मत च्याकाः उगु उत्सवया उलेज्या यानादीगु खः । उगु इलय् मूपाहां येँ महानगर प्रमुख शाक्यं उत्सवया उलेज्या लिसें क्लबया न्हूगु भवनया नं उलेज्या यानादीगु खः । क्लबया न्हूगु भवनया स्वतँजाः व पिनेया आवरणया निंतिं येँ महानगरपालिकां ग्वाहालि याःगु खः । येँ महानगरपालिकाया ग्वाहालिइ स्थानीय उद्यमयात प्रवद्र्धन यायेगु ल्याखं पुचलं उगु उत्सवया ग्वसाः ग्वःगु खः ।
‘स्थानीय उद्यमी प्रवद्र्धन’ नारा बियाः न्ह्याःगु उत्सवया उलेज्याझ्वलय् येँ महानगरपालिकाया प्रमुख कार्यकारी अधिकृत राजेश्वर ज्ञवाली, येँ महानगरपालिका १८ वडाअध्यक्ष न्हुछेकाजी महर्जन, वडासदस्य शोभा महर्जनलिसें आपालं स्थानीयतय् उपस्थिति दुगु खः ।
नसाज्वलंया स्टललिसें स्थानीय उद्यमीतय्सं तयार याःगु कापः, धातुया थीथी हलंज्वलंया ब्वज्या याःगु ज्याझ्वलय् थीथी कलाकारतय्सं सांस्कृतिक ज्याझ्वः नं न्ह्यब्वःगु खः ।
LEAVE YOUR COMMENTS