कुटुम्ब ब्यान्ड व आइएसएसपाखें शैक्षिक सामग्री वितरण

येँ(नेपालभाषा टाइम्स)- नेपाःया नांजाःगु सांगीतिक पुचः कुटुम्ब व इन्टरनेशनल साउण्ड सर्भिस (आईएसए)पाखें काभे्रपलाञ्चोकया बेथानचोक गाउँपालिका वडा नं. ३ बेथानचोक नारायण आधारभूत विद्यालयया विद्यार्थीपिंत शैक्षिक सामग्री लःल्हाःगु दु । कुटुम्ब व आईएसएसं उगु विद्यालयया ११७ म्ह विद्यार्थीयात स्कुल ब्याग, स्टेशनरी लगायतया शैक्षिक सामग्री लःल्हाःगु खः ।

बेथानचोक गाउँपालिका वडा न. ३ वडाअध्यक्ष कुबेर ढकालया प्रमुख आतिथ्यताय् जूगु छगू ज्याझ्वःया दथुइ कुटुम्ब सांगीतिक पुचःया पबित महर्जन व आइएसएसया सुरेश शाक्यं मंकाःकथं विद्यालयया प्रधानाध्यापक सिताराम लामायात शैक्षिक सामग्री लःल्हानादीगु खः ।

उगु इलय् कुटुम्बया महर्जनं थःपिनिगु ‘स्कुल टु स्कुल’ ज्याझ्वः अन्तर्गत उगु शैक्षिक सामग्री लःल्हानागु जानकारी बियादीगु खःसा आइएसएसया शाक्यं थःपिनिगु सामाजिक उत्तरदायित्व अन्तर्गत विद्यार्थीपिंत अध्ययन सामग्री लःल्हानागु जानकारी बियादीगु खः ।

प्रधानाध्यापक लामां विद्यार्थीतय् पठनपाठन सहज यायेत कुटुम्ब व आइएसएसं याःगु ग्वाहालिं विद्यार्थीतय्त आखः ब्वनेत थप हौसला व पे्ररणा बीगु विश्वास प्वंकादिसें ग्वाहालिया निंतिं निगुलिं संस्थाप्रति आभार प्वंकादिल ।