जापानी बुद्ध देगःयात बुद्ध मूर्ति उपहार

येँ(नेपालभाषा टाइम्स)÷ जापानया शिजुओका सहरया निंतिं नेपालं बुद्ध मूर्ति उपहार बिउगु दु । शिजुओका सहरया होन्जान खाइच्याजी बौद्ध देगःया निंतिं नेपाःपाखें भूमिस्पर्श याना च्वनाबिज्याःम्ह बुद्ध मूर्ति उपहारकथं लःल्हाःगु खः ।

सफ्टवेयर इन्जिनियर प्रा. नरेश महर्जन व जापानया हे तःधंगु व्यावसायिक घरानाया म्हसीका दुम्ह सुगियामां नेपाःपाखें भूमिस्पर्श याना बिज्यानाच्वंम्ह बुद्ध मूर्ति उपहारकथं लःल्हाःगु खः । नेपाःपाखें प्राप्त उगु बुद्ध मूर्ति होन्जान खाइच्याजी देगःया मुख्य संरक्षकलिसें पुजारी जापानी भिक्षु नाखाज्यो निचियुं स्थानीय ईकथं सुथसिया साइटय् देगलय् दुत यंकाः उपासक उपासिकापिनिगु उपस्थितिइ मूर्ति प्रतिस्थापन यानादीगु खः ।

नेपालं उपहारकथं बुद्ध मूर्ति लःल्हाःगु होन्जान खाइच्याजी देगः जापानया हे दकलय् पुलांगु देगःमध्ये छगः खः । थ्व देगः च्यागूगु शताब्दीपाखे हेइआन शासनकालय् स्थापना याःगु खः । उगु देगःया क्वय्या तल्लाया तःधंगु हलय् तःधिकःम्ह जापानी बुद्ध मूर्ति थापना यानातःगु दुसा नेपालं हालय् लःल्हाःगु बुद्ध मूर्ति वयां च्वय्या तल्लाय् तःगु दु ।

भूमि स्पर्श याना बिज्याना–च्वंम्ह उगु मूर्ति नेपालं जापान यंकाः अनया देगःयात लःल्हायेगु निंतिं सफ्टवेयर इन्जिनियर प्रा. महर्जन, उपासिका रीता महर्जन तःधंगु ग्वाहालि यानादीगु खःसा बुद्ध जन्म जूगु देय् नेपालं बुद्ध मूर्ति हयाः जापानयात लःल्हाःगु धासें देगःया संरक्षकलिसें पुजारी निचियुं वय्कःपिंत साधुवाद देछाना बिज्याःगु खः ।