सम्झौता अवधि सिधल मास प्रिन्टर थ्यंकः मवल

येँ – सरकारं ग्लोबल टेन्डर प्रक्रियापाखें मास प्रिन्टर हयेगु प्रक्रिया न्ह्याकूगु खःसां आतक हयेफुगु धाःसा मदुनि । ‘स्मार्ट चालक अनुमति पत्र’ वितरणय् जुयाच्वंगु ढिला सुस्तीयात चिइकेगु ल्याखं सरकारं ग्लोबल टेन्डर प्रक्रियापाखें मास प्रिन्टर न्यायेगु प्रक्रिया न्ह्याकूगु खः । मास प्रिन्टर आतक थ्यंकः वःगु मदुनिसा मेखे थ्व सम्बन्धी जूगु सम्झौता वंगु आइतवाः सिधःगु दु ।

क्वछिनागु इलय् हे मास प्रिन्टर हयेगु निंतिं कम्पनीयात थःपिंसं तःक्वः ताकेता यानागु यातायात व्यवस्था विभागं न्ह्यथंगु दु ।मास प्रिन्टर थ्यंकः वःगु लछि लिपा हे थःपिंसं नियमित रुपं ज्या शुरु यायेगु तयारी जुयाच्वंगु विभागं न्ह्यथंगु दु । विभागं भारतया मद्रास प्रिन्टर प्रालिपाखें स्मार्ट चालक अनुमतिपत्र छापे यायेगु मास प्रिन्टर न्यायेत्यंगु खः ।

तर प्रिन्टर थ्यंकः मवःगुलिं ज्या न्ह्याकेगु प्रक्रिया तकं थातिं लाः वंगु दु । प्रिन्टर थ्यंकः वयेवं विभागं १० लाख कार्ड छापे यायेगु तयारी याःगु खः । कार्ड व प्रिन्टर निगुलिं हयाः आः खने दयाच्वंगु ढिलासुस्तीयात चिइकेगु उद्देश्य जूगु विभागं न्ह्यथंगु दु ।

उपकरण थ्यंकः वयेवं उकिया जडान, परीक्षणया दक्वं ज्या सिधयेकाःनियमित ज्या संचालन यायेगु तयारी दुगु विभागया महानिर्देशक कुमारप्रसाद दहालं कनादिल । प्रतिघन्टा ५०० कार्ड छापे यायेगु क्षमता मास प्रिन्टरया दु ।