
येँ – किपू नगरपालिका–५ स्थित सलिख्यलय् पुखू अतिक्रमण यानाः दनेत्यंगु छखा छेँ स्थानीय जनतां थुना बिउगु दु । पुखू त्वपुक दनेगु शुरु याःगु उगु छेँया डीपीसी व प्यंगः पिलर स्थानीय जनतां थुना बिउगु खः । सार्वजनिक हितया निंतिं पूर्खां दयेकातःगु बुंगाःचाय् छेँ दनेगु लिसें सार्वजनिक त्वनेगु लःया पाइप लानातःगु थासय् तकं डीपीसी यायेवं आक्रोशित जूपिं स्थानीय जनतां उकियात थुना बिउगु खः ।
लिसें उमिसं छेँ दनेत म्हुयातःगु तुं नं थुनाबिउगु दु । उगु बुंगाःचा दुगु कित्ता नम्बर २०५ यात फिल्डबुकय् नं बुंगाः धकाः हे च्वयातःगु दयेक दयेकं जबर्जस्ती छेँ दनेगु ज्या याःगुलिं स्थानीय जनतां थुना बिउगु खः ।
अन छेँ दनाच्वंम्ह छेँथुवाः चन्द्र निरौलां थः झापायाम्ह व प्रधानमन्त्रीलिसे थःगु व्यक्तिगत स्वापू दु धायेगु यानाच्वंगु खँ सीदुगु दु । थ्व स्वयां न्ह्यः छेँ क्वय् लाःगु लःया पाइप लाइन बारे खँ ल्हाः वंबलय् नं वं स्थानीय जनतायात ख्याना हःगु कारणं सर्वसाधारण जनता तम्वःगु खः ।
LEAVE YOUR COMMENTS