डबल नेकपा दुने सत्ता संघर्ष

नेपाल कम्युनिष्ट पार्टी (नेकपा) दुनेया अन्तर संघर्ष लिपांगु इलय् वयाः क्वचाल । पार्टी एकताया निंतिं निम्ह हे अध्यक्ष केपी शर्मा ओली व पुष्पकमल दाहाल दथुइ छप्पँ जुयाः वनीगु जुल धकाः तायेकाच्वंगु हे इलय् हाकनं मेगुकथंया संघर्ष सुरु जूगु दु व धइगु पार्टी दुनेया हे शक्ति संघर्ष खः । पार्टी दुने मेमेपिं नेतात न्ह्याक्व हे हाःसां व छुं तःधंगु विषय मखु । निम्ह अध्यक्षया दथुइ खँ पातकि जक तःधंगु विषय जुइगु, निम्ह अध्यक्ष छप्पँ जुलकि पार्टीया समस्या हे समाधान जुइगु ज्या मदिक्क डबल नेकपा दुने जुया वयाच्वंगुलिं पार्टी धइगु निम्ह अध्यक्षया जकं मखुला धइगु तकं न्ह्यसः ब्वलना वयाच्वंगु दु। पार्टी दुने समस्या नं थ्व हे निम्ह अध्यक्षपिंसं हइगु अले समाधान नं थ्व हे निम्ह अध्यक्षपिंसं यायेगु यानाच्वंगु खनेदुगुलिं डबल नेकपा धइगु हे ओली-दाहाल थें जुया वःगु खः । पार्टी दुने न्ह्यागु हे समस्या वःसां थ्व हे निम्ह अध्यक्ष नापं च्वनीगु जुल बाय् छम्ह अध्यक्षया बःकाः वन धाःसा उम्ह नेता कार्यकर्तायात पार्टीं ग्वहालि नं याइगु अले सुरक्षित नं याइगु, मखुसा पार्टी दुने च्वनाः नं छुं हे कथंया मूल्यांकन मजुइगु अवस्था वल धकाः पार्टीया केन्द्रीय नेतातय्सं तकं महसूस यानाहःगु खँ खः ।

पार्टी दुने निम्ह अध्यक्षया ल्वापु अले निम्ह हे अध्यक्षपाखें समाधान यायेगु धइगु छगू उदाहरणया खँ खः । कर्णाली प्रदेशया मुख्यमन्त्री महेन्द्रबहादुर शाहीविरुद्ध थःगु हे पार्टीया प्रदेश सदस्यपिंसं अविश्वासया प्रस्ताव दर्ता याःगु घटना । थः विरुद्ध थःगु हे दलया प्रदेश सांसदतय्सं अविश्वासया प्रस्ताव तयेवं मुख्यमन्त्रीं सरकारया बांलाःगु ज्याया प्रचार यायेगु ला खँ हे त्वःते खाली सरकार परिवर्तनया हल्ला यायेगु व ज्या मछिंकेगु ज्या जक यानाजुल, पार्टी दुनेया खँ खः जिं पार्टी दुने हे च्वनाः सामना यायेत तयार दु धकाः टिप्पणी यानादीगु दु। प्रदेश मुख्यमन्त्री शाहीं नं वास्तवय् थुकथंया टिप्पणी यानाः थःगु प्रतिक्रिया बियादीगु धइगु थःगु हे पार्टीया अध्यक्षनापं प्रधानमन्त्री केपी शर्मा ओलीं थःत ज्या मछिंगु अवस्थाय् बियादीगु अभिब्यक्ति थें हे च्वं धकाः धायेफइगु अवस्था दु। प्रधानमन्त्री ओलीयात राजीनामाया माग पार्टी दुनेपाखें हे याना हयेवं थः पार्टी दुने हे च्वनाः सामना यायेत तयार दु धकाः अभिब्यक्ति बियादीगु खँ लुमंकीगु कथं हे अज्वःगु शैली आः वया मुख्यमन्त्री शाही प्रस्तुत जुयादीगु खने दु। डबल नेकपा दुने प्रधानमन्त्री ओलीं केन्द्र व प्रदेशया मन्त्रिपरिषद् पुनर्गठन यायेगुकथंया तयारी यानादिल धइगु खँ पिहां वयेवं हे संघीय संसदंनिसें प्रदेश सांसदत तकं थःथःपिं मन्त्री जुइ खनी ला धकाः सक्रिय जुया वःगु दु । प्रधानमन्त्री हिलेबलय् गथे पार्टीयात लिच्वः लाइ धकाः हिलेगु ज्या याये मजिउ धइगु खँ वल अथे हे प्रदेशया मुख्यमन्त्री हिल धाःसां उकिं अस्थिरता ब्वलनेफु धकाः स्वयं उगु पार्टीया नेतातय्सं धयाच्वंगु हे इलय् वयाः मुख्यमन्त्री विरुद्ध अविश्वास प्रस्ताव दर्ता याःगुयात मनूतय्सं अर्थपूर्ण रुपं कयाहःगु दु ।

प्रधानमन्त्री ओलीं केन्द्र व प्रदेशया मन्त्रिपरिषद् पुनर्गठन यायेगुकथंया तयारी यानादिल धइगु खँ पिहां वयेवं हे संघीय संसदंनिसें प्रदेश सांसदत तकं थःथःपिं मन्त्री जुइ खनी ला धकाः सक्रिय जुया वःगु दु ।

पार्टी दुनेया ल्वापु कर्णाली प्रदेशय् नं खने दयेवं मुख्यमन्त्री महेन्द्रबहादुर शाहीं प्रमुख सचेतक बालाजब शाहयात जिम्मेवारीपाखें चीकाः सीता नेपालीयात हयेगु ज्या तकं याःगु दुसा छुं हद तक ल्वापु तच्वया हे वयाच्वंगु खने दु। आइतवाः अविश्वासया प्रस्ताव दर्ता याःगु खःसा सोमवाः तकया दुने ला संसदीय दलया प्रमुख सचेतक हे चीकेगु ज्या तकं जूगु दु । थ्व डबल नेकपाया निम्ह अध्यक्षयात तकं दबावया विषय जुया बिउगु दु। निम्हं हे अध्यक्षपिंत थः लिक्क लाःपिं नेता कार्यकर्तानिसें प्रदेशया सांसदतय्सं तकं लबिङ यायेगुनिसें दबाव बीगु तकं यानाहःगुलिं इमित नं कपाः स्याःगु विषय जुयाबिउगु दु। कर्णाली प्रदेशय् मुक्कं याना ४० म्ह सांसद दु। अले पुलांगु एमाले पक्षधरपिं २० म्ह सांसद दुसा पूर्व माओवादी पक्षयापिं १३ म्ह दु। पुलांम्ह एमालेया सांसद यामलाल कँडेल मुख्यमन्त्रीया दावेदार जुयाः न्ह्यःने वःगु दुसा आः नं शाही विरुद्धया अविश्वासया प्रस्ताव धइगु नं पुलांपिं एमाले पक्षधरया सांसदयात हे मुख्यमन्त्री यायेगु निंतिं जुयाच्वंगु कुतः खः धकाः धायेफइगु अवस्था दु। आः कर्णाली प्रदेश दुने खने दुगु डबल नेकपाया ल्वापु पार्टीया त्वाः त्वालय् तक थ्यनीगु जक मखु कन्हय् वनाः बागमती प्रदेशय् नापं प्रदेश नम्बर १ दुने नं थुगु हे कथंया लिच्वः लाइगु अवस्था नं दु ।

डबल नेकपा दुनेया थुकथंया ल्वापु वास्तवय् सरकारय् च्वनाः ज्या यायेगु अर्थात सत्ताया अभ्यास यायेगु सवालय् ल्वापु खः । केन्द्र अर्थात संघीय संसदय् पुलांपिं एमालेतय्गु बाहुल्यता दुगु अले उगु हे पक्षधरकथं ओली प्रधानमन्त्री जुयाच्वनादीगु खःसा छुं छुं प्रदेशय् पुलांपिं माओवादीतय्सं नेतृत्व यानाच्वंगु दु । अन नं पुलांपिं एमालेतय्सं हे कब्जा यायेगु कथंया कुतः याःगुलिं थ्व ल्वापु पिहां वःगु खः धकाः पुलांपिं माओवादीया नेतातय्सं धायेगु यानाच्वंगु दु। थ्व धइगु पार्टी एकता प्रक्रियानाप स्वानाच्वंगु अले पार्टी दुने सुनां नेतृत्व यायेगु अले छु पक्षयात न्ह्यःने तया यंकेगु धइगु नाप नं स्वानाच्वंगु दु ।

पार्टी दुनेया नेतृत्व जक मखु सत्ताया नेतृत्वया सवालय् तकं डबल नेकपा जूसां नं निगू पार्टी पुलांगु एमाले व पुलांगु माओवादीया विभाजन आतक नं दनि धकाः स्पष्ट यायेगु ज्या कर्णाली प्रदेशया मुख्यमन्त्री चीकेगु निंतिं जूगु कुतलं स्पष्ट जूगु दु। आः डबल नेकपाया निम्ह अध्यक्षं थुगु विषययात ध्यानय् तयाः बहस याइ अले निम्हं अध्यक्षया दथुइ गोप्यकथं भद्र सहमती जुइवं कर्णाली प्रदेशया समस्या नं समाधान जुइ । समस्या व समाधान व हे निम्ह अध्यक्षपिंसं याइ धइगु मान्यता पार्टी दुने ब्यापक रुपं स्थापित जुया वनाच्वंगु दु। थ्व धइगु वास्तवय् पार्टी दुने नं ब्यक्तिवादी हावी जुया वनाच्वंगुया सन्देश खः । निम्ह अध्यक्षया दथुइ सत्ता संघर्षया अभ्यास यायेगु झ्वलय् थःगु पक्षयात मजबुत यायेगु नापं पार्टी व सरकार निगुलिं कब्जा यायेगु कथंया खेल अन्तर्गत थुगु कथंया ज्या जुयाच्वंगु धकाः धायेफइगु अवस्था दु ।