ने. सं. ११४३ तछलाथ्व द्वादशी -

थनिंनिसें येँय् कांग्रेस तःमुँज्या

येँ -सत्तारुढ दल नेपाली कांग्रेसया १४ क्वःगु तःमुँज्या थनिंनिसें येँय् शुरु जुइत्यंगु दु । थुकिया लागिं सम्पूर्ण तयारी पूरा जूगु खँ धाःगु दु । तःमुँज्याय् कांग्रेसं जनप्रदर्शन याइ मखु धाःसां नं थौं स्वंगूनिसें प्यंगू लाख तक कार्यकर्ताया ¥याली पिहां वइगु खँ कांग्रेसं धाःगु दु ।

कांग्रेसया तःमुँज्या थनिंनिसें शुरु जुइगु जूसां सभापतिया उम्मेदवार जुइपिं सु सु खः धइगु खँ धाःसा आः तकं क्वःमजिउनि । संस्थापन पक्षं प्रधानमन्त्री एवं वर्तमान सभापति शेरबहादुर देउवा हे हानं उम्मेदवार जुइत्यंगु दुसां वय्कःया विपक्षय् दनीम्ह धाःसा अझं क्वःमजिउनि । संस्थापन इतर पक्षया वरिष्ठ नेता रामचन्द्र पौडेल, प्रकाशमान सिंह, डा. शशांक कोइराला व शेखर कोइरालां सभापति दावी यानाच्वंगु दुसा पौडेलयात मंकाः उम्मेदवार दयेकेगु कुतः नं जुयाच्वंगु दु । पौडेलया सर्वसम्मत सभापति उम्मेदवार दयेकेगु खःसा थम्हं त्वःते धकाः डा. शशांकं धायेधुंकूगु दु ।

तर सिंह व शेखरं पौडेलयात सर्वसम्मत यायेगु बारे निर्णय मयाःगुलिं थ्व पुचलय् अन्यौल जुयाच्वंगु दु । देउवायात बुकेगु लागिं पौडेल, सिंह व कोइरालाद्वय लगे जुयाच्वंगु खःसां यदि सर्वसम्मन मजुल धाःसा थ्व पुचः नं कुचा दलेफइगु खँ धाःगु दु । थ्व पुचः कुचा दल धाःसा उकिया लबः सभापति देउवायात निश्चित दु ।

थ्वहे झ्वलय् केन्द्रीय दुजःपिंसं सिंह व कोइराला दथुइ सहमति जुइ मफइगु अवस्था वल धाःसा उकिया जिम्मा थःपिंत बीत माग याःगु दु । केन्द्रीय दुजःपिसं पौडेलयात हे मंकाः उम्मेदवार कथं प्रस्ताव याइगु सम्भावना दु ।

सभापतिया उम्मेदवारी बीत च्वनाच्वंपिं प्यम्ह नेतापिंत मसःतुसे च्वंगु केन्द्रीय दुजःपिनिगु बैठकं थीथी विकल्पय् सहलह ब्याकूगु खः । उगु सहलहय् यदि मंकाः उम्मेदवार मजुल धाःसा देउवायात बुके फइगु सम्भावना मदुगु खँ पिहां वःगु खः । उकिं उमिसं पौडेलयात सर्वसम्मत उम्मेदवारया लागिं प्रस्ताव याःगु खः ।

केन्द्रीय दुजःपिसं म्हिगः हे सिंह व कोइरालायात नापलानाः सहलह ब्याकूगु खःसा कोइरालां पौडेलयात सर्वसम्मत यायेगु खँय् थः सहमत दुगु संकेत बिउगु खः तर सिंहं धाःसा झिंस्वक्वःगु महाधिवेशनय् थम्हं पौडेलयात त्वःता बीधुनागु जूगुलिं थुगुसी थःत त्वःतेमाःगु खँ धयादीगु खः । निर्णय मजूनिसां मंकाः उम्मेदवार दयेकेगु सम्भावना धाःसा थौं बहनी तक नं कायम हे जुयाच्वंगु खँ केन्द्रीय दुजःपिंसं धाःगु दु ।

गगन थापां सिटौला क्याम्प त्वःतल
युवा नेता कथं चर्चित गगन थापां कृष्णप्रसाद सिटौला खेमा त्वःतूगु दु । म्हिगः थापां महामन्त्री पदय् यकःति उम्मेदवारी बीवं सिटौला पक्ष त्वःतूगु संकेत खनेदुगु खः । उम्मेदवार घोषणाया झ्वलय् थापां थःगु सभापति सु जुइ धइगु खँ थम्हं मसिउ धासें तर थम्हं थःगु नितिं जक मखुसें सभापतिया नितिं नं मत फ्वनेगु खँ धयादीगु दु । मेखे सिटौलां थः विश्वासपात्र कथं युवा नेता प्रदिप पौडेलयात न्ह्यःने हःगु
दु । म्हिगः छगू पत्रकार सम्मेलन यासें सिटौलां थनिंनिसें पौडेलं युवातय् प्रतिनिधित्व याइ धासें पार्टीइ न्ह्यःने हयेगु घोषणा यानादीगु खः । थ्व स्वयां न्ह्यः सिटौलाया विश्वासपात्रया रुपय् थापा दुगु खः ।