ने. सं. ११४६ बछलाथ्व पञ्चमी - दयावीरसिं बुदिं

कांग्रेस महामन्त्रीइ थापा व शर्मा त्यात, सभापति देउवा प्यानलं दंपिं निम्हं पराजित

येँ- नेपाली कांग्रेसया महामन्त्रीइ गगन थापा व विश्वप्रकाश शर्मा त्याःगु दु । शेखर कोइरालाया प्यानलं महामन्त्री पदय् उम्मेदवारी बिउम्ह थापा दकलय् अप्वः ३०२३ मत हयाः विजयी जूगु खः । उकथं हे प्रकाश थापा प्यानलं उम्मेदवारी बिउम्ह विश्वप्रकाश शर्मा १९८४ मत हयाः महामन्त्रीइ विजयी जुयादीगु खः ।

कांग्रेसया येँय् जूगु झिंप्यक्वःगु महाधिवेशनं प्रधानमन्त्री शेरबहादुर देउवा सभापतिइ त्याःसां महामन्त्रीइ धाःसा वय्कःया पक्षयापिंसं त्याके मफुत । महामन्त्री पदय् मुक्कं खुम्ह उम्मेदवार दंगुलिइ देउवाया प्यानलं दंपिं प्रकासशरण महत व प्रदीप पौडेल प्यंगूगु व न्यागूगु थासय् लाःगु खः । थापा व मिनेन्द्र रिजाल सभापतिया उम्मेदवार शेखर कोइरालाया प्यानलं दंगु खः । रिजाल धाःसा स्वंगूगु थासय् लाःगु दु । कांग्रेस महामन्त्री पदय् पराजित जुइवं रिजालं रक्षामन्त्री पदं नं राजीनामा बियादीगु दु ।

उपसभापति पदय् देउवाया पक्षया पूर्णबहादुर खड्का व कोइराला पक्षया धनराज गुरुङ्ग त्याःगु दु । कांग्रेसया विधान कथं पदाधिकारीइ छम्ह सभापति, निम्ह उपसभापति, निम्ह महामन्त्री व च्याम्ह सहमहामन्त्री दइ । कोषाध्यक्ष धाःसा निर्वाचित केन्द्रीय सदस्यमध्ये छम्हेसित ल्यइगु जुइ ।

थ्वहे झ्वलय् महामन्त्री पदय् निर्वाचित जुइधुंकाः थापां महाधिवेशनय् थःत वःगु मतयात न्याय बीगु खँ धयादीगु दु । महामन्त्री पदय् निर्वाचित जुइधुंकाः पार्टी ज्याकू सानेपाय् पत्रकारत लिसे खँ ल्हासें थापां आः छन्हु नं चुके जुइगु व दीगु सुविधा मदुगु खँ धयादीगु दु ।

थापां महाधिवेशनं कांग्रेसयात सम्पूर्ण रुपय् नेतृत्व हिलेगु अवसर बिउगु खःसां नं महाधिवेशनं उगु म्याण्डेट मबिउगु धासें उकियात स्वीकार यायेगु खँ नं धयादीगु दु । थम्हं महामन्त्रीया हैसियतं सभापतियात ज्या यायेत बल व तागत बीगु निंतिं ग्वाकाच्वनेगु खँ नं नेता थापां धयादीगु दु । उकथं हे वय्कलं सभापति शेरबहादुर देउवायात थःलिसे प्रतिस्पर्धा याःपिंत कःघानाः वनेत इनाप नं यानादीगु दु ।