देगः सछि दँ क्यंगु लसताय् विशेष ज्याझ्वः

ख्वप – थनया राम मन्दिर देगः स्थापना जूगु सछिदँ पूवंगु लसताय् वंगु शुक्रवाः छगू विशेष ज्याझ्वः जुल । मूपाहांकथं झायादीम्ह शताब्दी पुरुष सत्यमोहन जोशीं देगः स्थापना जूगु सछिदँ पूवंगु लसताय् जूगु ज्याझ्वः त्वाःदेवाय् मत च्याकाः उलेज्या यानादीगु खः ।

मूपाहां जोशीं उगु इलय् पिथंगु लुमन्ति पौया नं विमोचन यानादीगु खः । ज्याझ्वलय् नवासें वय्कलं विशेष मनूतय् योगदानपाखें हे समाज नैतिकवान जुयाः न्ह्याः वनाच्वनी धयादिल । ज्याझ्वलय् विशेष पाहांकथं झायादीम्ह ख्वप नगरपालिकाया प्रमुख सुनील प्रजापतिं नायःतय् गौरव च्वन्ह्याकेत चन्द्र शम्शेरया पालय् हे थीथी विकास निर्माणया ज्या यानाः कृष्णमान कुम्हाः नं बियादीगु योगदानयात कयाः च्वछायादिल ।

वि.सं.१९७६ माघ १३ गते श्रीपञ्चमिया न्हिकुन्हु लाकाः कृष्णमान कुम्हाःनृंगु देगः स्थापना याःगु खँ देगलय् च्वंगु अभिलेखय् न्ह्थनातःगु दु। देगः सछिदँ पूवंगु लसताय् जूगु विशेष ज्याझ्वः नं वय्कःया सन्तानपाखें ग्वसाः ग्वःगु खः । ज्याझ्वलय् देगःनाप स्वापू दुपिं व खलःया ज्येष्ठ नागरिकयात हनेज्या नं याःगु खः ।

थ्व हे झ्वलय् पूर्वी भेगय् दयेकूगु फल्ताया नं उलेज्या याःगु खः । ज्याझ्वः राम मन्दिर संरक्षण तथा विकास समितिया नायः डा. इन्द्रप्रसाद प्रजापतिया सभापतित्वय् जूगु खः ।