ने. सं. ११४६ बछलागा चौथी -

जरुरी महत्वया प्रस्ताव दर्ता

प्रदेश ३ या संसदय् डेंगीया चर्चा

येँ – ३ नम्बर प्रदेशया आपालं जिल्लाय् डेंगीया प्रकोप तच्वयाः वनेवं प्रदेशया संसदय् जरुरी महत्वया प्रस्ताव दर्ता जूगु दु । नेपाल कम्युनिष्ट पार्टीया प्रमुख सचेतक रामेश्वर फुँयालं उगु प्रस्ताव दर्ता यानादीगु खःसा उकिया समर्थन नेपाली कांग्रेसया सचेतक राधा घले यानादीगु खः । उकथं हे सांसद कञ्चन खनालं नं उकिया समर्थन यानादीगु खः ।

प्रस्ताव दर्ता जुइवं उकियात कयाः थीथी सांसदपिंसं न्ववायेगु सुझाव बिउगु खः । संसदय् न्ववायेगु झ्वलय् सांसद बसन्त मानन्धरं डेंगी ल्वय्या उपचार सहज जुइमाः धासें नियन्त्रणया निंतिं योजनावद्ध रुपं न्ह्याःवनेमाःगु सुझाव बियादीगु दु । उकथं हे थीथी राजनीतिक पार्टीया सभासदपिंसं डेंगी ल्वय् म्हसिकेगु निंतिं माःगु किटया अभाव जुयाच्वंगु धासें सरकारं याकनं फुक्कं सरकारी अस्पतालय् किटया आपूर्ति यायेमाःगु माग नं याःगु दु ।

संसदय् न्ववायेगु झ्वलय् सांसदपिंसं निजी अस्पतालय् नं वासः भीड अप्वया वनाच्वंगु, तर निजी क्षेत्रं सर्वसाधारण जनतायाके अप्वः ध्यबा कायेगु यानाच्वंगुयात नियन्त्रण यायेमाःगु माग नं याःगु दु ।संसदय् दर्ता जूगु प्रस्तावयात कयाः लिसः बीगु झ्वलय् सामाजिक विकास मन्त्री युवराज दुलालं प्रदेश सरकारं आवश्यक ज्या यायेगु कुतः यायेगु बचं बियादीगु खः ।

म्हिगः जरुरी महत्वया प्रस्तावयात कयाः मानन्धरया लिसें सांसपिं सरस्वती वाटी, कृष्ण खनाल, नरोत्तम बैंद्यलगायतया सांसदपिंसं न्ववानादीगु खः । थ्वहे झ्वलय् डेंगी नियन्त्रण यायेगु निंतिं येँ महानगरपालिकां याकनं हे बैठक सःतेत्यनागु खँ प्रवक्ता ईश्वरमान डंगोलं ‘नेपालभाषा टाइम्स’ यात कनादीगु दु ।

वय्कलं डेंगीया महामारी विशेष बैठक सःतेगु निंतिं थम्हं मेयर विद्यासुन्दर शाक्ययात इनाप यानागु खँ कनादीगु दु । लिसें प्रवक्ता डंगोलं वासः यायेगु निंतिं आर्थिक रुपं समस्या जुयाच्वंपिंत येँ मनपां ग्वाहालि यायेगु योजना दुगु खँ कनादिल ।

थ्वहे झ्वलय् येँयायात ध्यानय् तयाः विशेष सरसफाई यायेगु योजनां नं येँ महानगरपालिकां दयेकाच्वंगु दु । उकथं हे २१ वडाय् डेंगी सचेतना ज्याझ्वः यायेत्यंगु दुसा येँमनपां थीथी वडाय् नं सचेतना ज्याझ्वः यायेगु कथं तयारी यानाच्वंगु जानकारी नं प्रवक्ता डंगोलं बियादीगु दु ।