मेलम्चीया लः विश्व स्वास्थ्य संगठनया मापदण्ड कथं शुद्ध

येँ (नेपालभाषा टाइम्स)- मेलम्चीं वइगु लःया गुणस्तरय् शंका मयायेत खानेपानी मन्त्रालयं अपिल याःगु दु । खानेपानी मन्त्रालयया सहसचिव लिसें प्रवक्ता मिना श्रेष्ठं म्हिगः छगू सुचं जारी यासें मेलम्चीया लः विश्व स्वास्थ्य संगठनया मापदण्ड कथं शुद्ध जूगु व थुकियात प्रशोधन यानाः शुद्ध जुइधुंकाः जक उपभोक्ताया हितिइ छ्वयेगु यानाच्वंगु धासें उकी शंका मयायेत इनाप याःगु खः ।
मन्त्रालयया प्रवक्ता श्रेष्ठं जारी याःगु सुचनय् धयातःगु दु, ‘मेलम्ची खानेपानी आयोजनाया प्रशोधन केन्द्र सुन्दरीजलय् विश्व स्वास्थ्य संगठनया मापदण्ड कथं प्रशोधन यानाः प्रसारण यानागु दु । पुलांगु पाइप लाइन ताः इलंनिसें सञ्चालन मजूगुलिं पाइपय् दुगु चाया अवशेषया कारणं लः इनेगु झ्वलय् छुं ई लः फोहोर वये फइगु जूसां ‘फ्लसिङ’ लिपा बुलुहुँ सफा लः वइगु जूगुलिं त्वनेगु लःया गणस्तरय् शंका मयायेत व पिनेया हल्लाया लिउलिउ मवनेत मन्त्रालय व मन्त्रालय मातहत खानेपानी उत्पादन व वितरण लिसे सम्बन्धित निकाययात अपिल यानाच्वना ।’
वंगु सोमवाःनिसें इउँगु मेलम्चीया लः बुलुक वःगु व थुकिया गुणस्तरय् शंका जूगु धासें समाचार वयेवं मन्त्रालयं थ्व अपिल जारी याःगु खः ।
ताः ई लिपा मेलम्चीया लः वःगु खःसां थीथी थासय् हाकुक हे फोहोर जूगु लः वःगु धासें थीथी थाय्या मनूतय्सं सामाजिक सञ्जालय् नं किपा तयेगु याना हःगु दु । यक्व थासय् धाःसा लः वइ धाःसां मवःगु खँ नं धयाहःगु दु ।