यात्रा प्रतिबन्ध लित कायेत दक्षिण अफ्रिकाया आह्वान

एजेन्सी- दक्षिण अफ्रिकाया राष्ट्रपति सिरिल रामापोसां कोरोनाया न्हूगु भेरियन्ट ओमिक्रोनया कारणं दक्षिण अफ्रिका व अफ्रिकी देय्तय्त तःगु यात्रा प्रतिबन्धया आलोचना यासें प्रतिबन्ध आः थथें लित कायेत आह्वान याःगु दु । ओमिक्रोन पत्ता लगे जुइधुंकाः न्हापांखुसी नवासें दक्षिण अफ्रिकाया राष्ट्रपति रामापोसं यात्रा प्रतिबन्धया पलाः गलत जूगुलिं प्रतिबन्ध आः थथें लित कायेमाः धकाः धाःगु खः ।

राष्ट्रपति रामापोसं यात्रा प्रतिबन्धय् छुं नं वैज्ञानिक आधार मदुगु व दक्षिण अफ्रिकायात भेदभाव याःगु धाःगु खः । प्रतिबन्ध तयाः भाइरसयात पनेगु खँ प्रभावकारी मजूगु नं राष्ट्रपतिं धाःगु दु । यात्रा प्रतिबन्धं यानाः देसया अर्थतन्त्र जक स्यंकीगु व महामारीविरुद्ध प्रतिक्रिया बीगु क्षमतायात कमजोर याइगु राष्ट्रपतिं धाःगु दु । थ्वयां न्ह्यः दक्षिण अफ्रिकाया विदेश मन्त्रालयं न्हूगु भेरियन्ट लुइकागु बापत थःपिंत प्रशंसा यायेगु पलेसा दण्ड बिल धकाः धाःगु खः ।

दक्षिण अफ्रिकालिसें थीथी अफ्रिकी देय्तय्त युरोपियन संघ दुने च्वंगु देय्, अमेरिका, अस्टे«लिया, जापान, इरान, क्यानाडा आदि देशं प्रतिबन्ध तयेधुंकूगु दु ।

विश्व स्वास्थ्य संगठनं यात्राय् प्रतिबन्ध तःगु देय्तय्त ख्याच्वः बिसें यात्रा प्रतिबन्ध तयेबलय् जोखिम व वैज्ञानिक आधार स्वयेमाः धाःगु दु । न्हूगु भेरियन्टया थ्व कोरोना भाइरस ओमिक्रोन न्हापायागु भाइरससिबें ग्यानापुगु धाःगु दु । लिसें आः दुगु खोपं थ्व भाइरसयात गुलि तक असर याइ धयागु विषयय् नं अनुसन्धान जुयाच्वंगु दु । थ्व भाइरस आतकया दुने दक्षिण अफ्रिकालिसें इटाली, जर्मनी, अस्ट्रेलिया, इजरायल, बेलायत, नेदरल्याण्ड्स, हङकङ, बेल्जियम, बोत्स्वाना, क्यानाडा, चेक गणतन्त्र, फ्रान्स आदि देसय् खनेदयेधुंकल ।

ओमिक्रोन भाइरस खनेदुगुलिं थ्व हे डिसेम्बर १ तारिखनिसें विद्यार्थीतय्गु निंतिं अन्तर्राष्ट्रिय सिमाना चायेकेत्यंगु अस्टे«लियां आः सिमाना चायेकेगु खँय् हाकनं बिचाः याइगु जूगु दु । अथे हे जापानं दक्व विदेशी यात्रुतय्त सोमवाः निसें जापानय् दुमकाइगु जूगु दु । इजरायल नं आइतवाःनिसें विदेशी यात्रुतय्त दुमकाये धुंकल ।