
येँ -महाकवि सिद्धिदास महाजुं न्ह्याकादीगु नेवाः छन्द कविता जागरण अभियानयात निरन्तरता बीगु तातुनाः वंगु सोमवाः छगू विशेष मुँज्या दथुइ नेवाः छन्द कविता पुनर्जागरण अभियान न्ह्याकेगु क्वःछिउगु दु । नेवाः छन्द कविता प्रेमीपिनि दथुइ जूगु थुगु मुँज्याय् लोककवि राजभाइ जकःमिं नेवाः छन्द कविता पुनर्जागरण अभियानया अवधारणा पौ न्ह्यब्वयादीगु खः । द्वलंद्वःदँ न्ह्यवंनिसे नेवाः पुर्खां संरक्षण यायां वयाच्वंगु छन्द शास्त्र न्हू पुस्तायात हस्तान्तरण व पुस्तान्तरण यानाः नेपालभाषा पद्य साहित्य धुकू च्वजायेकेगु हे अभियानया मू उद्देश्य खः धयागु खँ थ्व अवधारणाय् न्ह्यब्वयातःगु दु ।
नेपालभाषा पद्य कविताय् तःजिक योगदान यानादीपिं पुलांपिं कविपिंत सम्मान यायेगु व न्हू च्वमिपिंत प्रोत्साहन बीगु ग्वसाः दुगु थुगु अभियान राष्ट्रियस्तरय् जक मखु थौंया न्हूगु प्रविधि छ्यलाः अन्तर्राष्ट्रिय् स्तरय् तकं न्ह्याकेगु खँ क्वःजिउगु दु । मुँज्याय् वःगु सुझावयात दुथ्याकाः थ्व अवधारणा सर्वसम्मतं पारित यायेगु ज्या जूगु खः ।
नापनापं थ्व अभियान न्ह्याकेत लोककवि राजभाइ जकःमिया कजिसुइ विमला मानन्धर, रत्नकाजी मन, मचाराजा महर्जन, डा. सुमन मानन्धर, अन्जना ताम्राकार व राधेश्याम महर्जनपिं दुथ्याःगु छगू ज्यासना पुचः नीस्वने ज्या नं जूगु दु । थुगु सहलह मुँज्यां याकनं हे “कलकल” नांगु नेवाः छन्द काव्यिक पौ पिथनेगु व छन्दवद्ध चिनाखँ स्यनेकने ज्याभ्mवः न्ह्याकेगु खँ नं क्वःजिउगु दु ।
LEAVE YOUR COMMENTS