देय्या नक्साया केक ताना नयेगु राज्यद्रोह खः : श्रेष्ठ
येँ- समाजवादी पार्टीया सहअध्यक्ष राजेन्द्र श्रेष्ठं देय्या नक्साया केक तायेगु राज्यद्रोह जूगु धासें प्रधानमन्त्रीं राजीनामा बीमाःगु माग यानादीगु दु । प्रधानमन्त्रीया पदय् च्वनाः देय्या नक्साया केक तायेगु धइगु राज्यद्रोह जूगुलिं प्रधानमन्त्री राजीनामा बीमाः धयादीगु खः । प्रतिनिधिसभा सदस्य तकं जुयाच्वनादीम्ह सहअध्यक्ष श्रेष्ठं पार्टीया चितवन जिल्ला समायोजना व पार्टी प्रवेश ज्याझ्वलय् नवासें उगु खँ धयादीगु खः ।
‘देय्या संविधान व मुलुकी संहितां देय्या भौगोलिक अखण्ता, राष्ट्रिय ध्वाँय्, निशान छापया अपमान जुइकथं ज्या याये मदइगु व्यवस्था यानातःगु दु’, वय्कलं धयादिल, ‘संघीयतां देय्यात तुसि ताःथें तानाः कुचा थलेगु ज्या याइ धयादीम्ह ओलीं थःगु बुन्हिबलय् नेपाःया नक्सयात बर्थडे केक दयेकाः नल । थ्व देय्या अपमान खः । नैतिकताया दृष्टिं नं सत्ताय् च्वनेगु अधिकार मदु ।’
कांग्रेस व कम्युनिष्टं न्ह्यःने हःगु समाजवादं देय्या बहुराष्ट्रियतायात सम्मान याये मफुगु, समाजवादया नामय् व्यक्तिवादयात प्रोत्साहित याःगु, समाज व जनतायात मखसे राज्य व नेतातय्त पुजनीय दयेकूगु द्वपं नं वय्कलं बियादिल ।नेकपाः समृद्धि व सुशासनया आपालं खँ ल्हायेधुंकूगु तर व्यवहारय् अःखः ज्या याना क्यंगु धासें भतिं दुरु त्वनीमखु धायेगु व नेकपां भ्रष्टाचार याइमखु धायेगु अथे अथे हे खः धयादिल । सेक्युरिटी पे्रस खरिद प्रकरणय् गोकुल बाँस्कोटाया टेप प्रकरणं नेकपां प्राप्त याःगु जनादेशयात भ्रष्टाचारया लाइसेन्स दयेकूगु द्वपं नं वय्कलं बियादिल ।
समायोजन समिति चितवन जिल्ला अध्यक्ष पे्रम भुजेलया सभापतित्वय् जूगु ज्याझ्वलय् पार्टी उपाध्यक्षपिंलिसें ज्याझ्वःया विशेष पाहां सांसद रेणुकुमारी यादव, नवराज सुवेदी, पुलांम्ह मन्त्री हिसिला यमि, बागमति प्रदेश उपाध्यक्ष राजु नेपाल, केन्द्रीय अनुशासन समितिया प्रमुख महेन्द्र श्रेष्ठ लगायतं नुगःखँ तयादीगु खः ।
भेलां प्रेम भुजेलया अध्यक्षताय् पार्टीया न्हूगु जिल्ला समिति नं गठन याःगु खःसा नेकपा व कांगे्रस परित्याग याना वःपिंत पार्टी प्रवेश नं याकूगु खः ।
LEAVE YOUR COMMENTS