‘तःमुँज्याय् बियागु फुक्क बचं पूवंकेगु जुइ’

 उदेन न्हूसाय्मिपाखें

धरान- नेवाः देय् दबूया न्हूम्ह नायः कथं पवित्र वज्राचार्य अत्यधिक बहुमत हयाः निर्वाचित जुयादीगु दु । म्हीग वय्कःया प्रतिस्पर्धा माइलाबाबु द्यःलालिसे जूगु खःसा म्हिगः सुथय् मतगणनाया लिच्वः वःबलय् वज्राचार्यया पक्षय् ३१३ मत वःगु खःसा वय्कःया प्रतिद्वन्द्वि माइलाबाबु द्यःलाया पक्षय् ६७ मत वःगु खः।
मतदानय् मुक्कं ३८६ भोट कुतुं वंगु खः । थ्व ल्याखं वज्राचार्य फुक्क स्वयां दकलय् अप्वः मत कयाः त्याःम्ह उम्मेदवार समेत जुयादीगु दु ।

अथे हे वरिष्ठ उपाध्यक्ष पदय् २३५ मत कयाः चन्द्रलाल राजभण्डारी निर्वाचित जुयादीगु दुसा वय्कःया प्रतिद्वन्द्वि शंकरनारायण श्रेष्ठं १३६ मत काःगु दु । मिसा उपाध्यक्षपाखे रश्मिला प्रजापति अप्वः कयाः विजयी जुयादीगु दुसा गण्डकी उपाध्यक्षय् हरिकुमार श्रेष्ठ, लुम्बिनी प्रदेशया उपाध्यक्षय् नरेशकुमार राजभण्डारी व १ नं. प्रदेशया उपाध्यक्षय् अनिल मास्के विजयी जुयादीगु दु । उप महासचिव पदय् राजेन्द्रकुमार श्रेष्ठ त्याःगु दुसा खुल्ला सचिव पदय् हरिकुमार श्रेष्ठ व जीवेश शाक्य त्याःगु दु ।

देय् दबूया कार्यसमितिइ ४५ म्ह दुजः दइगु खःसां मेपिं दुजःत धाःसा अझं ल्ययेमाःगु दु । निर्वाचित सकलें दुजःतय्त म्हिगः हे शपथ ग्रहण ज्याझ्वः याःगु खः । तर प्रतिनिधित सकलें लिहां वने हथाय् चाःगुलिं निर्वाचित दुजःपिनि न्हापांगु मुँज्या, बधाई ज्ञापन वा समापन आदि छुं हे ज्याझ्वः मजुल ।
निर्वाचित जुइधुंकाः न्हूम्ह नायः पवित्र वज्राचार्यं थःत विश्वास यानाः मत बियादीपिं सकसितं सुभाय् देछासें वय्कःपिनि विश्वासय् आघात जुइगु छुं हे ज्या याये मखु धयादिल ।

‘नेपालभाषा टाइम्स’ लिसे बःचाहाकलं खँ ल्हासें वय्कलं तःमुँज्याया झ्वलय् थम्हं बियागु बचं फुक्कं पालना यायेगु प्रतिवद्धता प्वंकादिल । देय् दबूयात न्हूगु गति बीगु, देय् दबूया लागिं छेँ दनेगु, देय्न्यंकं भाषा अभियान न्ह्याकेगु, नेवाःतय् व्यावहारिक समस्यात ज्यंका वनेगु थःपिनि मू आज्जु जुइगु खँ नं कनादिल ।

सम्बन्धित बुखँ

LEAVE YOUR COMMENTS