ओेमिक्रोम पनेत सरकारपाखें तयारी

येँ – न्हूगु पिहां वःगु कोरोनाया ओमिक्रोन भेरियन्ट भारतय् समेत थ्यनेधुंकूगु पुष्टि जुइवं नेपालय् तःधंगु ग्याःचिकु ब्वलंगु दु । भारतय् थ्यनेधुंकूगु उगु भेरियन्ट नेपालय् दुमकायेगु लागिं आवश्यक पलाः ल्ह्वने माःगु खँय् चर्चा शुरु जूगु दु ।

छुं न्हि न्ह्यः जक राष्ट्रपति विद्यादेवी भण्डारीं थुकियात कयाः चिउताः प्वंकादीगु खःसा म्हिगः संसद अन्तर्गतया शिक्षा तथा स्वास्थ्य समितिं थ्व न्हूगु भेरियन्ट–पाखें जनतयात सुरक्षित यायेगु आवश्यक पलाः ल्ह्वनेत सरकारयात निर्देशन बिउगु दु ।

म्हिगः स्वास्थ्य मन्त्री विरोध खतिवडा समेत च्वंगु समितिया बैठकं ओमिक्रोन भेरियन्ट पनेगु लागिं आवश्यक पलाः ल्ह्वनेत सरकारयात निर्देशन बिउगु खः । आः नेपालं भारतीय सीमाय् तुरुन्त हे कडा निगरानी तयेमाःगु धासें भारतं वइपिं मनूतय्त खोप कार्ड स्वयाः जक दुकायेगु यायेत नं निर्देशन बिउगु खः । उकिया नापनापं नेपालय् जनताया दथुइ फयां फििछ याकनं खोप बीगु लागिं अभियान सञ्चालन यायेत नं उजं बिउगु दु । समितिया सभापति जयपुरी घर्तीं बुराबुरिपिंत छेँय् छेँय् हे वनाः खोप बीगु व्यवस्था यायेत नं निर्देशन बियादीगु खः । खोप बीगु लागिं स्थानीय निकायतय्सं ई तोके यानाः जक बीगु मयासे न्ह्यागु इलय् नं काये फइगु व्यवस्था यायेत नं निर्देशन बियादीगु खः ।

लिसें छुं जुयाः नेपालय् न्हूगु भेरियन्ट दुहां वयाः लिच्वः लाकेगु शुरु यात धाःसा उकिया उपचार याकेत अस्पतालय् माक्व बेड, माक्व अक्सिजन, भेन्टिलेटर आदिया व्यवस्था यायेत नं निर्देशन बिउगु दु । अस्पतालय् थज्याःगु व्यवस्था यायेत स्थानीय निकायत परिचालित जुइमाःगु खँ नं धाःगु दु ।

न्हूगु भेरियन्ट भारतय् नं लुल धायेवं नेपालय् नं कडा रुपं परीक्षण शुरु जूगु खँ सीदुगु दु ।