प्रदेश १ या संसद घेराउ

येँ (नेपालभाषा टाइम्स)-प्रदेश नं. १ या नां कोशी तःगु खँय् दना वःगु पहिचानया आन्दोलन आः हानं न्ह्याकीगु जूगु दु। वंगु छुं ई दिनाच्वंगु थ्व आन्दोलन आः हानं तच्वः जुइक न्ह्याकेगु निर्णय आन्दोलनकारीतय्सं याःगु खः ।

आः न्ह्याइगु आन्दोलनय् प्रदेश नं. १ या प्रदेश सभा घेराउ यायेगु खँ धाःगु दु। थ्वहे प्रदेश सभां ‘कोशी’ नां तःगु जुयाः प्रदेश सभा घेराउया ज्याझ्वः तःगु खः । घेराउ यानाः प्रदेश सभाया बैठक हे तयेके मबीकेगु आन्दोलनकारीतय्गु ग्वसाः दुगु खँ धाःगु दु।

आन्दोलनकारीतय्सं प्रदेशसभाया दुजः लिसें मुख्यमन्त्रीयात समेत आक्रमण यायेवं अन प्रदेश सभाया बैठक तकं च्वने फयाच्वंगु मदुनि । आन्दोलनकारीतय्सं कोशी प्रदेशय् नांयात समर्थन याःपिं सांसदतय्तप्रदेशय् दुमकायेगु घोषणा यानातःगु दुसा नापलाःपिं सांसदतय्त ख्वालय् हाखः पाकेगु ज्या नं यानाच्वंगु दु।

वंगु फागुन १७ गते अनया प्रदेशसभां प्रदेशया नां कोशी तःगु खःसा पहिचान पक्षधर दल व जातीय संस्थां प्रदेशया नां पहिचानया आधारय् तयेमाः धासें विरोध प्रदर्शन याना वयाच्वंगु खः ।

पहिचानया पक्षधर आन्दोलनकारीतय्सं एसईईया जाँच क्वचायेवं आः हाकनं आन्दोलन यायेगु तयारी शुरु याःगु खः । थ्वहे वइगु वैशाख १० गतेतक अल्टिमेटम बियाः मुख्यमन्त्री व प्रदेशसभा अध्यक्षयात ज्ञापन पौ बीधुंकूगु दु। यदि प्रदेशया नां हाकनं मतल धाःसा प्रदेशसभाया बैठक च्वनेमबीगु कथं आन्दोलन यायेगु तयारी याःगु दु ।

 

सम्बन्धित बुखँ

LEAVE YOUR COMMENTS