सर्वोच्च निसे बालुवाटार तक ‘न्याय मार्च’

येँ – प्रधानन्यायाधीश चोलेन्द्र शम्शेरया राजीनामा माग यासें म्हिगः सर्वोच्च अदालत निसें बालुवाटार तक ‘न्याय मार्च’ जूगु दु । न्यायलयया विवादय् ज्यंकेगु नितिं राजनीतिक दलतय्सं गुगुं नं कथंया प्रतिक्रिया मबीवं म्हिगः नेपाल बार एसोसिएसन लिसे थीथी पेसागत संगठनं सर्वोच्च अदालत निसें बालुवाटार तक मार्च पार्स याःगु खः ।

म्हिगःया न्याय मार्चय् नेपाल पत्रकार महासंघ, शिक्षक महासंघ, नेपाल इन्जिनियर्स महासंघ, जनस्वास्थ्य संघ, आदिवासी जनजाति महासंघ व वृहत नागरिक आन्दोलनं ब्वति काःगु खः । नेपाल बारं प्रधानन्यायाधीश जबराया कारणं न्यायालय विवादय् लानाच्वंगु धासें निरन्तर आन्दोनल यायेगु लिसें प्रधानन्यायाधशि जबराया राजीनामा फ्वनाच्वंगु खः ।

उकथं हे सर्वोच्च अदालतया झिंच्याम्ह न्यायाधीशपिसं नं प्रधानन्यायाधीश जबराया क्वःछिउगु इजलासयात बहिष्कार याना वयाच्वंगु खःसा म्हिगः च्वंगु सर्वोच्च अदालतया फुलकोर्टया बैठकं वइगु मंसिर १५ गते निसे गोल प्रक्रियां इजलास क्वःछीगु निर्णय याःगु दु । म्हिगःया फुलकोर्टया बैठकय् प्रधानन्यायाधीश जबरा उपस्थित मजूगु खःसां नं फुलकोर्टया बैठकया निर्णययात कयाः धाःसा प्रधानन्यायाधीश जबरां हस्ताक्षर यानादीगु दु ।

म्हिगः फुलकोर्टया बैठकया निर्णय कथं आः निश्चित न्यायाधीश पिनिगु इजलासं क्वःजीगु मुद्दा नं गोल प्रक्रियां सुनुवाइ जुइगु जूगु दु । उकथं हे निर्णय न्यंकेगु क्वःजी धुंकूगु मुद्दायात गोल प्रक्रिया यंकेगु सहमति जूगु दु ।

नेपालभाषा टाइम्स

च्वमिया मेमेगु

• भ्वँतय् न्हापांखुसी नेपालभाषा साहित्य तःमुँज्या
• न्हूदँया लसताय् येँ–चौतारा मोटरसाइकल र्‍याली
• संस्कृतिविद् गणेशराम लाछिया ७५ क्वःगु बुन्हि हन
• लुँया भावय् न्हूगु कीर्तिमान
• नेपालय् न्ह्यानाच्वंगु जुजुवादी आन्दोलन, भारतीय हिन्दूत्वया लिच्वः