इजलासया न्यायाधीशत विवादय्

येँ – प्रतिनिधिसभा विघटन बारे सुनुवाई यायेत गठन जूगु संवैधानिक इजलासया संरचनायात कयाः विवाद ब्वलंगु दु । म्हिगः बहस शुरु जुइवं हे अधिवक्ता गोविन्द बन्दीं फागुन २३ गते नेकपायात एमाले व माओवादीया हे अवस्थाय् लित छ्वःम्ह न्यायाधीश बमकुमार श्रेष्ठ व उगु फैसलाया पुनरावेदन याके मबिउम्ह न्यायाधीश तेजबहादुर केसीया संवैधानिक इजलासय् तये मजिउ धइगु बिचाः तयादीवं थ्व विवाद पिहां वःगु खः ।
फागुन २३ गतेया फैसला माग दाबी स्वयां अप्वः जूगु व यदि अथे मजूगु खःसा आःया राजनीतिक स्थिति मजुइगु खइ धासें अधिवक्ता बन्दीं उपिं निम्हेसित इजलासय् तये मजिउगु तर्क यानादीगु खः ।

बन्दीया अज्याःगु तर्क वयेवं प्रधानन्यायाधीश चोलेन्द्रशम्शेर जबरां उगु फैसला व आःया प्रतिनिधिसभा विघटनया मुद्दा दथुइ छु स्वापू दु धकाः न्ह्यसः तयादीगु खः । वय्कलं धयादिल, ‘उगु फैसला पाय्छि खः कि मखु धकाः छिं थन धाये दइमखु, उगु मुद्दानाप थुगु मुद्दाया छु स्वापू दु ?’
तर अधिवक्ता बन्दीं धाःसा श्रेष्ठ व केसी बाहेकया संवैधानिक इजलास गठन यायेत माग यानादिल ।

उकथं हे वरिष्ठ अधिवक्ता बद्रीबहादुर कार्कीं नं आः न्ह्यसः ब्वलंपिं न्यायाधीशपिं थःपिंसं हे इजलास त्वःतेमाःगु सुझाव बियादिल । वय्कलं थ्व स्वयां न्ह्यः जूगु प्रतिनिधिसभा विघटनया मुद्दाय् संवैधानिक इजलासया न्यायाधीश हरिकृष्ण कार्की इजलासय् मच्वंगु दसु न्ह्यब्वयादीगु खः ।

प्रधानन्यायाधीश जबरां धाःसा नेकपाया नां सम्बन्धी उगु मुद्दा व आःया मुद्दाया दथुइ छु स्वापू दु धकाः हानं तयादिल । वय्कलं धयादिल, ‘थ्व निगू मुद्दाया सम्बन्ध छु खः ? उगु मुद्दां तात्विक स्वापू तइला ? तात्विक स्वापू तइ कि तइ मखु ?’

प्रधानन्यायाधीश जबरायात लिसः बिसें वरिष्ठ अधिवक्ता कार्कीं धयादिल, ‘छम्हेस्यां जक न्ह्यसः थंगु अवस्थाय् नं न्यायाधीश थः हे इजलासय् च्वनेमजिउ ।’

लिसलय् प्रधानन्यायाधीश जबरां थः नं पुनरावलोकन मबीगु इजलासय् दु, उकिं आः थःगु बारे नं न्ह्यसः दनी कि दनी मखु धकाः न्यनादिल । उकिया लिसलय् वरिष्ठ अधिवक्ता कार्कीं धयादिल, ‘थ्व प्रधानन्यायाधीश थम्हं हे बिचाः यायेमाःगु खँ खः ।’

वयां लिपा बहस यानादीम्ह वरिष्ठ अधिवक्ता शम्भु थापां थुकियात स्पष्ट यासें धयादिल, ‘संवैधानिक इजलास प्रधानन्यायाधीशया हे अध्यक्षताय् गठन यायेमाःगु व्यवस्था दुगुलिं प्रधानन्यायाधीशया हकय् मेगु हे खँ जुल ।’

अधिवक्ता थापां स्पष्टं धयादिल, ‘वंगु फागुन ११ गतेया फैसलां प्रतिनिधिसभा पुनस्र्थापना यानाः दलयात संसद चले यायेत आदेश बिउगु खःसा २३ गतेया फैसलां तःधंगु दलयात विभाजन यानाबिउगु खः । न्हापा न्याम्ह न्यायाधीशया संवैधानिक इजलासं गुगु तःधंगु पार्टीयात प्रतिनिधिसभा न्ह्याकि धकाः आदेश बिउगु खःसा लिपाया फैसलां वहे पार्टीयात विभाजन यानाबिल, उगु निर्णय सम्मानित सर्वोच्च अदालतया खः ।’

प्रधानन्यायाधीश जबरां उगु मुद्दायात पुनरावलोकन याके मबीगु इजलासय् थः नं दुगु प्रसंग हानं हयेवं वरिष्ठ अधिवक्ता थापां उकिया नं विकल्प दु धासें धयादिल, ‘अथे खःसा प्रधानन्यायाधीश बिदाय् च्वनादिसँ ।’

सरकारया प्रतिरक्षा यायेत बहस यानादीम्ह महान्यायाधिवक्ता रमेश बडालं धाःसा न्हापाया मुद्दायात कयाः अदालतयात दबाबय् तयेत थज्याःगु खँ पित हःगु द्वपं बियादिल । संवैधानिक इजलासय् दुपिं न्यायाधीशतय्गु बारे न्ह्यसः चिं थनेगु खःसा थम्हं नं उकथं हे न्ह्यसःचिं थनाः आः दुपिं फुक्कं न्यायाधीशया इजलासयात हे चीके फइगु अवस्था वय फइगु ख्याच्वः नं वय्कलं बियादिल ।

संवैधानिक इजलासया निम्ह न्यायाधीशपिनि बारे विवाद पिहां वयेवं आः वय्कःपिं थुकी च्वने जिउ लाकि मजिउ धकाः कन्हय् निर्णय यायेगु व वयां लिपा जक संसद विघटन सम्बन्धी सुनुवाई न्ह्याकीगु जूगु दु ।