भर्चुअल माध्यमं नेवाः हुलाप्याखं ब्वज्या

येँ – नेवाः अमेरिकन दबू, शिकागोया ग्वसालय् नेपाः, अमेरिका व अष्ट्रेलियाय् च्वंपिं मस्तय् दथुइ भर्चुअल माध्यमं नेवाः हुलाप्याखं ब्वज्या जुल ।

वंगु शनिवाः जूगु थुगु ज्याझ्वलय् झिंन्याम्ह मस्तय्सं झिस्वपु हुलाप्याखं न्ह्यब्वःगु खः । ज्याझ्वलय्अपूर्व कर्माचार्य, आयुष्का जोशी, इच्छा श्रेष्ठ, मोनिका केसउी, नूर महर्जन, रविना श्रेष्ठ, नम्रता श्रेष्ठ, सुहानी बलामी, सजगता मानन्धर, श्रेयना ताम्राकार, शुभी साव, सुभाष राजभण्डारी, सचेतना मानन्धर, सुहन बलामि व शरोन वसीपिंसं ब्वति काःगु खः ।

ज्याझ्वःया कजि केशरमान ताम्राकारं शिकागोय् च्वंपिं व थुकिया जःखः च्वंपिं नेवाःतय्त छधी छप्पँ यानाः नेवाः भाय्, संस्कृत, साहित्य, कला, तजिलजि संरक्षण नापं थपू यायेगु तातुनाः झिंछदँ न्ह्यः नेवाः अमेरिकन दबू नीस्वनागु खँ कनादीगु ज्याझ्वलय् दबूया नायः किरण व्यञ्जनकारं लसकुस यानादीगु खः । ज्याझ्वः व मस्तय् प्रतिभाया बारे जगत सुन्दर ब्वनेकुथिया प्रधानाध्यापिका सुनिता मानन्धरं थःगु नुगःखँ धयादीगु खः ।

ज्याझ्वःया प्रत्यक्ष प्रशारण यायेत नेवाः सुचना केन्द्रया राजेन्द्र रंजितं ग्वाहालि याःगु खः ।