जब द्यः खिउँइ थिमि दना वइ

न्हियान्हिथं द्यः खिउँया वःलिसे मध्यपुर थिमिया निगू पुखू लागाय् स्थानीयवासिन्दातय् चहलपहल व उगु थाय्या रौनक अप्वया वनी । न्हियान्हिथं हे छेँय् दुने दुहां वने धुंकूपिं नं सनिलया ६ ताः ई जुलकि बुलुहुं थःथःगु छेँय् नं पिहां वयाः निगू पुखुपाखे वनी । मध्यपुर थिमि नगरपालिका वडा नं. ४ स्थित निगु पुखुलिइ छुं ई लिपा हे झःझः धायेक मत च्याइ । अले नेवाः बाजंया रुपय् अतिकं लोकंह्वाःगु धिमे बाजंया सः ताये दया वइ ।

तपाःगु धकिनय् धिमेया सलय् छम्ह मिसा व छम्ह मिजं प्याखं हुलाच्वंगु आकृति खने दयावइ ।वयां लिपा व हे धिमेया तालय् थिमि देय छगुलिं हे प्याखं हुला हइ । वंगु निन्हु स्वन्हु न्ह्यवंनिसें न्हियान्हिथं थुकथं हे थिमि प्याखं हुलाच्वंगु दु । स्थानीय वासिन्दालिसें नांजाःम्ह साहित्यकार नवीनप्रकाश श्रेष्ठया परिकल्पना व मध्यपुर थिमि नगरपालिकाया ग्वाहालिइ न्हापांखुसी शुरु जूगु ‘खुल्ला धिमे प्याखं प्रशिक्षण’ सयेकीपिनिगु निंतिं जक मखु स्वइपिंत नं उतिकं आनन्द वयाच्वंगु दु ।

धिमेय्या संलसः तालमध्ये वंगु आइतवाःनिसें थ्व हे वइगु चैत २९ गतेतक १५ गू ताल बारे प्रशिक्षण न्ह्यानाच्वंगु दु । बिस्काः जात्रा गुलि न्ह्यःने थ्यंकः वयाच्वंगु दु, उलि हे थनया चहलपहल नं अप्वया वनाच्वंगु दु । बिस्काः जात्राया इलय् अनिवार्य रुपं हे त्वाःत्वालय् धिमे बाजंया सः ताये दइ । ‘धिमेया तालय् यक्वसित प्याखं हुले मवः । धिमे बाजं थाइपिं आपालं दया वःसां नं धिमेया सलंसः तालय् प्याखं हुलीपिं धाःसा म्हो जुजुं वनाच्वंगु दु ।

उकिं धिमेया तालय् प्याखं स्यनेगु निंतिं न्हापांखुसी थुकथं भिडियोपाखें धिमे प्याखंया खुल्ला रुपं प्रशिक्षण बीगु ज्या न्ह्याकागु खः’, परिकल्पनाकार श्रेष्ठं धयादी ।
दँयदसं थिमिइ नं बिस्काः जात्रा न्ह्याइ, तर ख्वपय् थें यःसिं थनेगु व खः तालेगु मखसे म्ये प्वाः खनेगु, सिन्हः जात्रा यायेगु स्वीनिखः खः जात्रा यायेगु ज्या थन जुइ । थिमिया मूल विशेषता धइगु हे थ्व स्वंगू जात्रा खः, थुकिं चछिन्हिछियंकं यानाः मेमेगु नं जात्रा जुयाच्वनी ।

बिस्काः जात्रा थनिंनिसें शुरु जुयाः वइगु बैशाख ५ गतेतक न्ह्याइ ।बिस्काः जात्राय् जक मखसे हरेक जात्रा, पर्व, भिंज्यानिसें कयाः सभा सम्मेलन व मूपाहांयात लसकुस यायेगुलिइ तकं थायेगु याइगु धिमे बाजंया तालय् प्याखं हुले मसःगुलिं जात्रा पर्वया इलय् लाक्वपाक्व प्याखं हुलेगु, चिल्लाय् दनाः हालेगु व हुलमुल यानाः घ्वातुमतु घ्वाना जुइगु प्रवृत्ति अप्वःगुलिं प्याखंयात व्यवस्थित यानाः थुकियात ल्यंका तयेत खुल्ला प्रशिक्षणया ग्वसाः ग्वयागु वय्कलं धयादिल ।

श्रेष्ठं धयादी, ‘धिमेया सलंसः ताल दु, उकीमध्ये आःयात १५ गू तालय् प्याखं हुलेगु प्रशिक्षण बियाच्वनागु दु, बिस्का जात्रा न्ह्यः चैत २९ गतेतकया दुने निद्वःम्हेसित प्याखं स्यनेगु उद्देश्यं थुकथं खुल्ला प्रशिक्षण न्ह्याका वयाच्वनागु दु, थुकिं लिपांगु पुस्तायात प्याखं हस्तान्तरण यायेगु तकं जुइ अले परम्परा नं ल्यंका तयेत ग्वाहालि जुइ ।’

न्हियान्हिथं सनिलया ६ः३० ताःइलंनिसें ८ः३० ताःतक संचालन जुइगु धिमे प्याखनय् नागरिकयात प्याखनय् साथ बीगु ल्याखं मध्यपुर थिमि नगरपालिकाया प्रमुख मदनसुन्दर श्रेष्ठ, उपप्रमुख अञ्जनादेवी मधिकःमि, वडा नं. ४ या वडाअध्यक्ष कुमार श्रेष्ठ लगायत पुलांपिं व वर्तमान जनप्रतिनिधिपिं थ्यंकः वइ । नागरिकलिसें जनप्रतिनिधिं नं नापं प्याखं सयेकेगु यानाच्वंगु दु ।

नगरप्रमुख श्रेष्ठं तःधंगु ल्याखय् छक्वलं धिमेया तालय् प्याखं सयेके फइगु जूगुलिं आकर्षक जूगु धयादी । वय्कलं धयादी, ‘थुकिं झीगु संस्कृति संरक्षण जक मखसे न्हू पुस्तायात थ्व प्याखं लःल्हाना वनेगु ज्या नं याइ ।’ प्याखं प्रशिक्षणय् ल्याय्म्हल्यासें निसें कयाः ज्याथजिथिपिं नगरवासीतय् तकं न्हियान्हिथं उल्लेख्य सहभागिता दयाच्वंगु दु ।

 

सम्बन्धित बुखँ

LEAVE YOUR COMMENTS