ने. सं. ११४४ कौलाथ्व पारू - नःलास्वनेगु

मरु सतः गबलय् चाली थें ?

येँ (नेपालभाषा टाइम्स)- मरु सतः दुने न्हू दयेकाः तःगु थीथी द्यःया मूर्तिया विवाद सम्बन्धी मुद्दाय् म्हिगः नं सर्वोच्च अदालतं छुं फैसला मयात । म्हिगः थ्व मुद्दा १ नम्बर इजलाशं स्वइ धकाः धयातःगु खःसां अन्तिम इलय् वयाः मुद्दा लिज्याःगु सुचं बिउगु खः । आः थुकिया पेशी थ्वहे वइगु माघ १५ गते जक जुइगु खँ धाःगु दु ।

काष्ठमण्डप पुनर्निर्माण समितिं मरु सतः दुने तयातःगु गोरखनाथ व प्यम्ह गणेद्यःया मूर्ति न्हू दयेकाः तःगु खः । २०७२ सालया भुखाचय् मरु सतः पूवंक दुना वंबलय् थ्व मूर्तित नं तज्याःगु खः । नेवाः समाजय् स्यंपिं द्यः पुज्यायेगु चलन मदु धइगु विश्वासं अन तज्याःगु मूर्ति लिकयाः न्हू दयेकाः तःगु खः । तर सम्पदा अभियन्तातय्सं पुरातात्विक महत्व दुगु मूर्ति लिकयाः न्हूपिं द्यः तये हल धासें उकिया विरुद्ध रिट दायर याःगु खः । सर्वोच्च अदालतय् वंगु निदँ न्ह्यवंनिसें थ्व मुद्दा न्ह्यानाच्वंगु दु ।

गुलिसिनं थ्वहे मुद्दाया कारणं मरु सतः दयेके सिधयेधुंकूसां सर्वसाधारणया लागिं खुल्ला याये मफयाच्वंगु खँ नं धायेगु यानाच्वंगु दु । तर काष्ठमण्डप पुनर्निर्माण समितिया नायः राजेश शाक्यं समितियात मरु सतः दयेकेगु धकाः जिम्मा बिउगु खः, आः दयेके नं सिधयेधुंकूगु दु धासें आः थःपिंसं मरु सतः येँ महानगरपालिकायात लःल्हायेधुंकल कि महानगरपालिकां छु निर्णय याइ वहे कथं न्ह्याः वनी धयादिल ।

पुनर्निर्माण क्वचायेधुंकूगु मरु सतः आः याकनं हे मनपायात लःल्हायेगु तयारी जुयाच्वंगु जानकारी नं वय्कलं बियादिल । वय्कःया कथं महानगरपालिकां थःगु कथं निर्णय यानाः न्ह्यागु विकल्प नं ज्वने फइगु अवस्था दु ।

पुनर्निर्माण सिधयेधुंकाः नं खुल्ला मयाःगु कारणं सर्वसाधारण असन्तुष्ट नं जुया वयाच्वंगु दु । छुं ई न्ह्यः तिनि येँ मनपाया उपमेयर सुनिता डंगोलं मरुसतःया अनुगमन नं यानादीगु खः ।

आः न्ह्यानाच्वंगु मुद्दाया सवालय् नं वय्कलं सर्वोच्च अदालतं छु आदेश बी वहे यायेत थःपिं तयार दुगु खँ नं कनादिल । स्यंगु मूर्ति पुज्याये मत्यः धकाः शास्त्रय् च्वयातःगु व गुर्जुपिंसं नं वहे राय तःगु कारणं थःपिंसं न्हूगु मूर्ति तयागु खः धासें यदि पुलांगु मूर्ति नं सुरक्षितपूर्वक तयातयागु खँ वय्कलं कनादिल । यदि सर्वोच्चं पुलांगु हे मूर्ति तयेमाः धकाः आदेश बिल धाःसा पुलांगु हे मूर्ति तयेगु खँ नं वय्कलं कनादिल ।
वय्कलं धयादिल, ‘मुद्दा अदालतय् वनेधुंकूगु जुयाः आः आदेश पीगु बाहेक मेगु उपाय मदु ।’