जिमित हेपे यानागु ला ?

आरक्षण ! गन दु आरक्षण, नेपाःया संविधानय् ? संविधानय् मदुगु खँयात कयाः युरोपियन युनियनं (ईयुं) न्ववात । उकिसनं खस आर्य समुदाययात कयाः न्ववात । थ्व तसकं गलत । नेपाःया सार्वभौमसत्ताय् आक्रमण खः । नेपालय् विदेशी हस्तेक्षप खः । पश्चिमा देय्तय् उपनिवेशिक मानसिकताया उपज खः । न्हापा न्हापा थःगु हैकमय् मेगु देय्यात चले यायेगु कथं आः नं अज्याःगु हे यायेत स्वःल युरोपियन युनियनपाखें । नेपाः सार्वभौम देय् जूसां थःगु न्हापाया उपनिवेशिक मानसिकता कथं नेपाःया बारे युरोपियन युनियनं न्ववाःगु खः । झीगु देय् गरिब जुयाः झीत हेपे याःगु खः । झीत उपनिवेश कथं छ्यलेगु कुतः याःगु दु युरोपियन युनियनं ।

नेपाःया निर्वाचनया पर्यवेक्षण यायेत वःगु युरोपियन युनियनया निर्वाचन पर्यवेक्षण मिसनं थःगु प्रतिवेदन सार्वजनिक याःगु व सुझाव बीगु ज्या लिपा प्रधानमन्त्री निसें खस आर्य समुदायं न्ववानाच्वंगु शैली थज्याःगु हे खः । युरोपियन युनियनया सुझावयात कयाः खस आर्य समुदायं यानाच्वंगु विरोधया निरन्तरता अझ क्वचाःगु मदुनि । विरोधया झ्वलय् उगु समुदायया मनूतय्सं विशेष यानाः धयाच्वंगु निता हे जक खँ खः । छगू बाह्य हस्तक्षेप व उपनिवेशया खँ, मेगु नेपाः कमजोर जूगुलिं झीत हेपे याःगु खः । ईयुया प्रतिवेदनय् नेपाःया समुदायत कित्ताकाट यानाः पक्ष व विपक्षय् दनाच्वंगु दु । आः थुकिया बारे चर्चा मयाये । केवल खस आर्य समुदायं ल्ह्वनाच्वंगु निगू बिचाःयात कयाः सहलह याये ।

उमिसं विरोध यानाच्वंगु धइगु उपनिवेशवाद व हेपाहा प्रवृत्तिया खः । यदि धाथें खस आर्य समुदायं थ्व निता खँ तसकं इमान्दार जुयाः ल्ह्वनाच्वंगु खःसा उकियात जोडदारनक्सां देय् दुनेया समस्याय् नं ल्ह्वनेमाः । छाय्धाःसा वैदेशिक उपनिवेश व हैकमवाद स्वयां नेपाः दुनेया आन्तरिक उपनिवेश व हैकमवादी प्रवृत्तिं नेपाःयात हानी यानाच्वंगु दु । पिनेया उपनिवेश स्वयां आन्तरिक उपनिवेशं यानाः थन समानता व समृद्धिया ज्याय् पंगः थनाच्वंगु दु । छगू जातिया वर्चश्व व छगू जातिया हालिमुहालिं यानाः देशय् न्याय, समानता व थःगु पहिचानय् खतराय् लानाच्वंगु दु ।थज्याःगु इलय् खस आर्य समुदायं ल्ह्वंगु उपनिवेशया खँ झीसं पिनेयापिंत न्यंकाच्वनेमाःगु आवश्यकता मदु । पृथ्वीनारायण शाहं राज्य विस्तारया नामय् शुरु याःगु आन्तरिक उपनिवेश अझ दिउगु मदुनि । अझ नं उगु हे जाति समुदायं राज्यसत्ताय् च्वनाः हैकमवादी शासन चले यानाच्वंगु दनि । यदि देय् दुनेया थज्याःगु आन्तरिक उपनिवेश क्वःदलाः समानताया सिद्धान्त कथं देय् वनीगु खःसा थन सुं नं विदेशी शक्तिं छुं याये फइ मखु । दकलय् न्हापां झीगु देय् दुनेया समस्या समाधान यायेत स्वये, देय्या सार्वभौसत्ता अथें बल्लाना वनी ।

उपनिवेशया नापनापं खस आर्य समुदायं ल्ह्वंगु मेगु खँ हेपाहा प्रवृत्तिया खः । विषेश यानाः प्रधानमन्त्री केपी शर्मा ओलीं झी गरीब जुयाः झीत हेपे याःगु धकाः थःगु सम्बोधनय् न्ह्यथनादीगु खः । हेपाहा प्रवृत्तिया खँय् नं उपनिवेशया खँ थें हे खः । यदि सत्ता नाप २४० दँ निसें च्वनाच्वंगु समुदायं मेगु समुदाय प्रति हेपाहा प्रवृत्ति दिकेगु, सत्तां उत्पीडनय् लाकातःपिं जाति व भाषायात समान अवसर व अधिकारया ग्यारेण्टी यायेगु खःसा थन झीसं विदेशीतय् बारे खँ ल्हानाच्वने हे माली मखु । मुख्यतः आन्तरिक रुपं नेपाःया दक्वं समुदाययात समान अधिकार व अवसरया ग्यारेण्टि जुइमाः । थुलि जूसा देय् दुनेया विविधता दुनेया एकता मजबुत जुइ । जब देशय् च्वंपिं जनता एकीकृत जुइ, विदेशी शक्तितय्सं हेपे यायेगु अवसर हे दइ मखु ।

ईयुया प्रतिवेदन सार्वजनिक जूगु छुं दिं लिपा प्रधानमन्त्री केपी शर्मां ओलीं नेपाःस्थित कुटनीतिक नियोगया प्रमुख व विकास साझेदारतय्त सःताः सरकारया खुगू बुँदे प्राथमिकता न्यंकादिल । वय्कलं सार्वभौमसत्ता, लोकतन्त्रप्रति प्रतिवद्ध, सामाजिक न्याय व समानता, स्थिरता व विकास, सुशासन व जनताया आकांक्षा सम्बोधन यायेगु थःगु प्राथमिकता जूगु खँ न्ह्यथनादीगु खः । खस आर्य समुदायं विदेशी हस्तक्षेप, उपनिवेश व हेपाहा प्रवृत्तिया बारे धयाच्वंगु इलय् प्रधानमन्त्री ओलीं थःगु प्राथमिकताय् नं अज्याःगु हे खँ ल्ह्वनादिल ।

अझ प्रधानमन्त्रीं थःगु प्राथमिकताय् सामाजिक न्याय व समानता नापं जनताया आकांक्षा सम्बोधन यायेत थः प्रतिबद्ध जूगु न्ह्यथनादिल । विदेशी कुटनीतिक नियोगया प्रमुख, नेपाली जनताया न्ह्यःने प्रधामनमन्त्री थेंज्याःगु गरिमामयी पदय् च्वंम्ह मनुखं अथे धायेवं आः स्वाभाविक रुपं झीगु अपेक्षा धइगु फुक्कं जाति, भाषा, समुदाय व संस्कृतिया सम्मान अधिकार व प्रतिनिधित्वया सुनिश्चिता खः । प्रधानमन्त्रीं न्ववाःगु भाषणायात जक लिसा कायेगु खःसा आः खय् भाय् व नेपालभाषा नापं मेमेगु भाय्यात सरकारी कोषं समान अवसर व सुविधा वयेमाल । वय्कःया धापूयात विश्वास यायेगु खःसा आः नेवाः लगायत फुक्कं जातिया प्रतिनिधित्व व पहुँच राज्यया फुक्क थासय् समान रुपं दयेमाल । कन्हय् तीजया इलय् सरकार गुलि सुविधा बी उलि हे चथाःयात बीमाःगु खः । खय् भाय् मांभाय् जूपिंत थःगु भाय् ब्वनेगु अधिकार गुलि दु उलि हे मेमेगु जाति व भाषिक मनूतय्त नं दयेमाल । लः कायेगु हितिइ छम्ह ब्राम्हण कुलया मनूयात गुलि अधिकार दइगु खः उलि हे छम्ह दलितयात नं दयेमाल । छम्ह मिजंयात गुलि अवसर दइगु खः मिसायात नं उलि हे दयेमाल ।

यदि जनताया आकांक्षा सम्बोधन याइकथं सामाजिक न्याय व समानताया अधिकार मबीगु खःसा ओलीया प्राथमिकताय् लाःगु सार्वभौमसत्ता, लोकतन्त्र, स्थिरता व विकासया मुद्दा फुक्कं छखे लाइगु सम्भावना दु । सामाजिक न्याय व समानतया सुनिश्चितता मदइगु खःसा ओलीं ईयुयात लक्षित यानाः न्ववानादीगु खँ आन्तरिक रुपं झीसं लिसा कयाः वय्कःयात हे धाये माली – जिमित हेपे यानागु ला ?

सम्बन्धित बुखँ

LEAVE YOUR COMMENTS