विवादास्पद गुथि विधेयक बारे न्हूम्ह मन्त्रीलिसे सहलह

येँ- विवादय् लानाच्वंगु गुथि विधेयक बारे सहलह यायेत म्हिगः भूमि व्यवस्था मन्त्री शशी श्रेष्ठं गुथि विधेयक विरुद्ध आन्दोलनय् सहभागी थीथी संस्था व व्यक्तिततलिसे खँल्हाबल्हा यानादीगु दु । वय्कःलिसे खँ ल्हायेगु लागिं गुथि विधेयक विरुद्धया आन्दोलनया नेतृत्व यानादीम्ह नेवाः न्ह्यलुवा डा. महेशमान श्रेष्ठया नेतृत्वय् नेवाः कार्यकर्तातय्गु पुचः मन्त्रालयय् वंगु खः ।

खँल्हाबल्हाया झ्वलय् गुथि विधेयक विरुद्धया आन्दोलनकारीतय्सं पूर्ववर्ती केपी ओलीया सरकारं हःगु विधेयकयात थःपिंसं छाय् विरोध यायेमाःगु खः धइगु खँ स्पष्ट याःगु खः । वय्कःपिंसं नेवाःतय्गु गुथियात बिस्कं ढंगं स्वये माःगु खँ न्ह्यथँसें नेवाःतय्पाखें सञ्चालित गुथितय्त स्वायत्त व स्वतन्त्रता बीमाःगु माग यानादीगु खः । नेवाःतय्सं सञ्चालन याइगु गुथिया बिस्कं महत्व दइगु जुयाः थुकियात केवल भूमि जक मखुसें सांस्कृतिक दृष्टिकोणं नं स्वयेमाःगु खँ नं न्ह्यथंगु खः ।

नेवाः कार्यकर्तापिनि खँ न्यनेधुंकाः मन्त्री श्रेष्ठं थः नं छम्ह आन्दोलनं हे वयाम्ह कार्यकर्ता जूगु कारणं गुथिया बारे आन्दोलनं वःगु खँयात विशेष प्राथमिकता बियाः स्वयेगु बचं बियादीगु खँ वार्ताय् दुथ्याःम्ह छम्ह सहभागीं ‘नेपालभाषा टाइम्स’ यात कनादिल ।

मन्त्री श्रेष्ठं गुथि विधेयकय् गुथि सम्बन्धी खँयात स्पष्ट यायेगु लागिं आवश्यक जुल धाःसा थुकियात पुनर्लेखन हे यायेगु वा शुन्यंनिसें हे शुरु यानाः हानं च्वयेगु वा स्वंगू महल दयेकाः आवश्यक सुधार याना वनेगु खँय् थः तयार दुगु जानकारी यानादीगु खः । अथे हे वय्कलं थुकिया लागिं आवश्यक जूसा सरकार व आन्दोलनकारी निगुलिं पुचः नापं च्वनाः विधेयकया मस्यौदा च्वयेगु खँ नं कनादिल ।

गुथि विधेयक सम्बन्धी समस्यायात निष्कर्षय् थ्यंकेगु लागिं आः निगुलिं पक्ष दथुइ नियमित संवाद जुया च्वनेमाःगु खँय् नं मन्त्री श्रेष्ठं बः बियादीगु खः । आन्दोलनकारीतय्सं वय्कःयात गुथिया बारे थःपिंसं तयार यानातःगु सामग्रीत नं अध्ययनया लागिं बियाथकूगु खः । मन्त्री श्रेष्ठं आः थुकिया बारे थःपिंसं सहलह यानाः हानं खँल्हाबल्हा यायेगु खँ कनादिल ।

पूर्ववर्ती प्रधानमन्त्री केपी ओलीया सरकारं स्वदँ न्ह्यः हःगु गुथि सम्बन्धी विधेयकं नेवाःतय् गुथि परम्परायात लिच्वः लाकी धासें नेवाःतय्सं ऐतिहासिक कथं तःजिगु आन्दोलन याःगु खःसा वयां लिपा सरकारं उगु विधेयक लित काःगु खः ।

सम्बन्धित बुखँ

LEAVE YOUR COMMENTS