ने. सं. ११४४ ञलाथ्व दशमी -

यार्सा मी मफयाः वाथावाथा

येँ – व्यवसायीं न्यानातःगु यार्सागुम्बा मी मफयाः व्यापारीत समस्याय् लाःगु दु । वंगु असारंनिसें भदौ तक न्यानाकाःगु २ क्विन्टल स्वयां अप्वः यार्सागुम्बा मी मफयाच्वंगु खँ धाःगु दु । स्थानीय व व्यापारीया मू आयस्रोत जुयाच्वंगु यार्सा मी मफयाः नयेत तकं समस्या जुयाच्वंगु खँ स्थानीय वासिन्दां धाःगु दु ।

यार्सा व्यापारी तेजबहादुर बमं थुगु दँय् न्यानागु १ क्विन्टल यार्सा मध्ये बछि नं मीमफुगु खँ कनादीगु दु । वय्कलं थ्यंमथ्यं ९० किलोया हाराहारीइ यार्सागुम्बा न्यानागु व आः तक ३५ किलो जक मियागु खँ कनादिल । गुणस्तर स्वयाः किलों १७ लाखंनिसें २४ लाख तका पुलाः न्यानागु यार्सा थौंकन्हय् येँय् १० लाखं मीत तकं थाकुयाच्वंगु दु ।

विशेष यानाः चिनियाँ व्यापारीं यार्सागुम्बाया भाः क्वःकाःगुलिं मीत थाकुयाच्वंगु खँ वय्कलं कनादिल । दार्चुलाया आपाः धइथें व्यापारी येँय् वयाः यार्सागुम्बाया भाः मवःगुलिं निराश जुयाच्वंगु दु । यार्सा व्यापारी सोभानसिंह ठगुन्नाया कथं लछि तक येँय् च्वनाः नं यार्सा मी मफुगुलिं आः जिल्लाया आपालं व्यापारीत थःपिनिगु छेँ–बुँ मीमालीगु अवस्थाय् थ्यनाच्वंगु दु ।

यार्सागुम्बा मीमफयाच्वंगु तर बैंकया त्यासा व यार्सागुम्बा संकलकतय्त पुलेमाःगु ध्यबा गुकथं पुलेगु धइगु समस्या जुयाच्वंगु दु ।वय्कःया कथं आः थम्हं यार्सागुम्बा मीगु खःसा १ करोड स्वयां अप्वः घाटा जुइगु खने दु । व्यापारीतय्सं ध्यबा मबिउगुलिं यार्सागुम्बा संकलनया इलय् थिंकाः नयागु ध्यबा पुलेत तकं थाकुयाच्वंगु खँ स्थानीयवासीं धाःगु दु ।