सु जुइगु जुल न्हूम्ह राष्ट्रपति ?
येँ (नेपालभाषा टाइम्स)÷फागुन २५ गते जुइगु राष्ट्रपति चुनाव न्ह्यः हे थुकिया बारे सहमति दयेकेगु लागिं म्हिगः प्रधानमन्त्री पुष्पकमल दाहाल व एमाले अध्यक्ष केपी ओली दथुइ ताःहाकः खँल्हाबल्हा जूगु दु । राष्ट्रिय स्वतन्त्र पार्टीया अध्यक्ष रवि लामिछानेया सांसद लिसें मन्त्री पद बदर जुइधुुंकाः वय्कःपिनि दथुइ छुं हे संवाद मजुयाच्वंगु खः ।
एमाले अध्यक्ष केपी ओलीं लामिछानेयात हानं गृह मन्त्रालयया हे जिम्मेवारी बी माल धकाः प्रम दाहालयात तःक्वःमछि हे इनाप याःगु खःसां प्रम दाहालं उकियात वेवास्ता यायेवं निम्ह नेताया दथुइ संवाद मजुयाच्वंगु खः । ओलीं धाःसां नं प्रम दाहालं रवियात गृह मन्त्री मदयेकूगु कारणं ओली व दाहाल दथुइ समस्या ब्वलनीगु जुइ धकाः अनुमान जुयाच्वंगु खः । अझ रविया हे कारणं वर्तमान सत्ता गठबन्धन त्वाःदलेफु धइगु तक नं अनुमान जुयाच्वंगु खः ।
गृह मन्त्री मबिउ धकाः रविया पार्टी सरकारं पिहां वयेधुंकाः आः एमाले नं सरकारं पिहां वयेफु धकाः अनुमान जूगु खः । तर म्हिगः निम्ह नेताया दथुइ जूगु खँल्हाबल्हां धाःसा एमाले सरकारं पिहां वइगु छुं हे सम्भावना मदुगु खँ सूत्रं धाःगु दु ।
म्हिगः वय्कःपिनि दथुइ लामिछाने सरकारं पिहां वनेधुंकाःया राजनीतिक अवस्था, रविया पार्टीं त्वःतूगु स्वंगू मन्त्रालय इनेगु खँ व राष्ट्रपति चुनावया बारे खँ जूगु खँ धाःगु दु ।
एमालें राष्ट्रपति चुनाव तक पीगु लागिं हे लामिछाने सरकारं पिहां वंसां कडा प्रतिक्रिया मबिउगु खः । म्हिगःया वार्ताय् राष्ट्रपति चुनावय् एमालें प्रस्तावित याःम्ह मनूया पक्षय् हे राष्ट्रिय सहमति दयेकेगु बारे नं चर्चा जूगु खँ धाःगु दु । तर एमालें सुयात प्रस्तावित याइ धइगु खँ धाःसा सी मदुनि । एमालें वर्तमान राष्ट्रपति विद्या भण्डारीयात हे हानं राष्ट्रपति दयेकेगु तयारी यानाच्वंगु खँ पिहां वयेवं माओवादीं समर्थन मयायेगु खँ पित हःगु सूत्रया दावी दु ।
एमालेपाखें थौंकन्हय् राष्ट्रपतिया रुपय् अष्टलक्ष्मी शाक्य, सुभास नेम्बाङ व डोरमणि पौडेलया नां न्ह्यःने हयेत स्वयाच्वंगु खँ सीदुगु दु । माओवादीं नेम्बाङ व शाक्ययात जक समर्थन याये फइ धकाः धाःगु खँ सूत्रं कंगु दु । यदि माओवादीयात नं चित्त बुझे जूम्ह मनूया नां प्रस्तावित यात धाःसा समर्थन जुइगु खँ धाःगु दु ।
सूत्रया कथं एमालेया छगू लबी नेमकिपाया अध्यक्ष नारायणमान बिजुक्छेयात राष्ट्रपति दयेकेमाः धकाः नं सक्रिय जूगु दु । छुं ई न्ह्यः जक राष्ट्रपति विद्यादेवी भण्डारी आकाझाकां बिजुक्छेया छेँय् झायाः राष्ट्रपति चुनावबारे हे खँल्हाबल्हा यानादीगु खः । तर बिजुक्छे धाःसा माने जुयादीगु मदुनि ।
मेखे माओवादीं डा. बाबुराम भट्टराईयात राष्ट्रिय सहमति सहित राष्ट्रपति दयेकेत स्वयाच्वंगु दुसा मेखे नेकपा (एस) या वरिष्ठ नेता झलनाथ खनालं नं राष्ट्रपति जुइगु इच्छा यानादीगु खँ सूत्रं धाःगु दु ।
LEAVE YOUR COMMENTS