दाङय् थारु भाय् ब्वंकेगु तयारी
येँ (नेपालभाषा टाइम्स)- येँ महानगरपालिकां थः मातहतया फुक्कं सामुदायिक व संस्थागत स्कुलय् स्थानीय भाषा नेपालभाषाया माध्यमं स्थानीय विषय ब्वंकेगु शुरु यायेवं उकिया लिच्वः स्वनिगलं पिनेया थीथी स्थानीय तहलय् नं लाःवंगु दु ।
थ्व झ्वलय् आः दाङया घोराही उपमहानगरपालिकाय् नं स्थानीय थारु भासं स्थानीय विषय ब्वंकीगु जूगु दु । थुकिया लागिं थारु भाय्या पाठ्यक्रम तयार यायेधुंकूगु खँ सीदुगु दु । आः उगु पाठ्यक्रमया लिधंसाय् पाठ्यसफू नं च्वयेगु ज्या जुयाच्वंगु दु ।
पाठ्यसफू तयार मजूनिगुलिं ब्वंकेगु ज्या शुरु मजूनि । पाठ्यसफू तयार जुइवं ब्वंकेज्या नं शुरु जुइगु खँ धाःगु दु । उपमहानगरकाया सामाजिक विकास महाशाखाया प्रमुख विनोद गौतमं कनादीकथं पाठ्यक्रम तयार जूसां पाठ्यसफू तयार मजूनिगु कारणं ब्वंकेगु ज्या न्ह्याके मफुनि ।
नेपाःया न्हूगु संविधानं आः हरेक स्थानीय सरकारं थःगु मातहतया क्षेत्रय् थःपिंसं हे स्थानीय विषयया पाठ्यक्रम तयार यानाः ब्वंके फइगु व्यवस्था यानातःगु दुसा वहे अधिकार छ्यलाः घोराही उपमहानगरपालिकां थारु भाषाया माध्यमं स्थानीय विषय ब्वंकेगु व्यवस्था यायेत्यंगु खः । आः पाठ्यक्रम तयार जुइधुंकूगु कारणं मेगु शैक्षिक सत्रंनिसें थ्व विषय ब्वंका यंके फइगु खँ धाःगु दु ।
घोराहीइ आःयात छगूनिसें स्वंगू तगिं तक थारु भासं ब्वंकेगु व्यवस्था यायेत्यंगु खः । घोराही उपमहानगरया मेयर पदय् नरुलाल चौधरी त्याना वयेवं अन थारु भासं ब्वंकेगु कुतः शुरु जूगु खः । आः वइगु शैक्षिक सत्रनिसें थारू भाषाया ब्वंकेज्या शुरु हे जुइगु खँ मेयर चौधरीं कनादीगु दु ।
मस्तय्त उमिगु थःगु मांभासं ब्वंकेबलय् थुकिं याकनं सयेके सीकेत नं ग्वाहालि जू वनीगु बिचाः मेयर चौधरीं प्वंकादीगु दु । मांभासं ब्वंकेगु अवसर स्थानीय सरकारयात वःगुलिं वहे ल्याखं थःपिंसं कुतः यानागु खँ नं वय्कलं कनादिल ।
थ्वहे झ्वलय् तुलसीपुरय् बिस्कं व्यवस्था यानाः थीथी स्कुलय् ब्वंकाच्वंगु मगर भाय्या पढाइ धाःसा बन्द जूगु खँ सीदुगु दु । नगरपालिकायाके बजेट मदयाः मगर भाय्या पढाइयात बियाच्वंगु ध्यबा रोके जुयाः ब्वनेज्या बन्द जूगु खँ धाःगु दु । आः मेगु शैक्षिक सत्रंनिसें हानं ब्वंकीगु खँ धाःगु दु ।
LEAVE YOUR COMMENTS