सडक पीडितया विजय जुलुस

येँ – सतक विस्तार पीडित संघर्ष समितिया ग्वसालय् म्हिगः कलंकी–नागढुंगा तक विजय जुलुस पिकाःगु दु । निसःगः मोटरसाइकलय् द्वःछि स्वयां अप्वः पीडित जनतां ¥यालीइ ब्वति काःगु खः ।

¥यालीं कलंकी, नैकाप, सतुंगल बलम्बु थानकोट लागाय् चाःहिउगु खः । थानकोटय् थ्यंकाः सांस्कृतिक ¥याली सहित थानकोट लागाय् प्रदर्शन काःगु खः । ¥याली लिपा जूगु सभाय् न्ववायेगु झ्वलय् अधिवक्ता लिसें लाहुर्निपया महासचिव शंकर लिम्बुं सर्वोच्चया निर्णयं थानकोट व सक्वया पीडित जनता जक त्याःगु खः धासें आन्दोलनयात निरन्तरता बीमाःगु बिचाः प्वंकादीगु खः । वय्कलं स्वनिगःया मेमेगु थासय् नं सतक अतिक्रमण यायेगु ज्या जुयाच्वंगु धासें जनता सचेत मजुल धाःसा अझ नं समस्या वये फइगु खँ कनादिल ।

ज्याझ्वलय् संघर्ष समितिया संयोजक सुमन साय्मि व शान्त प्रकाश श्रेष्ठपिंसं नं सम्बोधन यानादीगु खः । थ्वहे झ्वलय् कन्हय् सोमवाः यलया जिल्ला प्रशासन ज्याकुथी धर्ना बीगुया लिसें ज्ञापनपौ लःल्हायेगु ज्याझ्वः क्वःछिनातःगु दु । यलया जल व थेच्वय् सिडियो व स्थानीय जनप्रतिनिधि दथुइ सतक विस्तार यायेगु कथं तयारी यानाच्वंगु खँ सीदुगुलिं थ्व ज्ञापन पौ बीत्यंगु खः ।

सर्वोच्च अदालतं थुगु लागाय् नं सतक विस्तार तत्काल मयायेत अन्तरिम आदेश बियातःगु दुसां नं जबर्जस्ती सतक विस्तार यायेत्यंगु धासें ज्ञापनपौ बीत्यंगु खः ।

 

सम्बन्धित बुखँ

LEAVE YOUR COMMENTS