
येँ- येँ महानगरपालिकाया आर्थिक विधेयक २०७८ पारित जूगु दु । वंगु आइतवाः थनया राष्ट्रिय सभागृहय् च्वंगु येँ महनगरया गुक्वःगु अधिवेशनया न्यागूगु बैठकं आर्थिक विधेयक पारित याःगु खः ।
वंगु असार १० गते न्ह्यब्वःगु आर्थिक विधेयक आइतवाःया बैठकं पारित याये न्ह्यः आन्तरिक आयया निंतिं राजस्वया शीर्ष, प्रस्तावित राजस्वया दर लगायत विषयय् व्यापक सहलह याःगु खः। येँ महानगरपालिकाया थन न्ह्यानाच्वंगु गुक्वःगु नगर अधिवेशनया झ्वलय् वंगु असार ३ गते नगरसभाय् आर्थिक दँ ०७८÷७९या निंतिं वार्षिक नीति तथा कार्यक्रम पेश यानाः सहलह याःगु खःसा उकियात असार ६ गतेया स्वंगूगु बैठकं पारित याःगु खः ।
आइतवाःया बैठकं कोरोना महामारीं ब्वलंगु समस्या व जनजीवनय् लाःगु प्रभावयात ध्यानय् तयाः उद्योग, वाणिज्य ख्यः व प्रभावित जनजीवनयात विश्लेषण यासें म्होतिं नं २० प्रतिशतनिसें अप्वलय् ९० प्रतिशततक छुट बीगु व्यवस्था याःगु दु ।
बैठकया अध्यक्षता यासें येँ महानगर प्रमुख विद्यासुन्दर शाक्यं कोरोना संक्रमणया महामारीं आर्थिक ख्यलं फये मालाच्वंगु समस्यायात विचाः यानाः आर्थिक ख्यःया म्हये फइगु राजस्व दर यथावत तयाः दायरा जक अप्वयेकेगु नीतिगत निर्णय यानागु जानकारी बियादिल ।
येँ महानगर प्रमुख शाक्य वंगु असार १० गते गुक्वःगु नगर अधिवेशनया प्यंगूगु बैठकय् आर्थिक दँ ०७८÷०७९या निंतिं ‘काठमाडौँ महानगरपालिका आर्थिक विधेयक, २०७८’ व उपप्रमुख हरिप्रभा खड्गी श्रेष्ठं वइगु आर्थिक दँया निंतिं १८ गू अर्ब ९५ गू करोड ७७ गू लख झिंनिद्वः तका दांया बजेट व विनियोजन विधेयक २०७८ न्ह्यब्वयादीगु खः ।
आइतवाःया बैठकय् विधेयकयात कयाः नगर सभा सदस्यपिं मचाराजा महर्जन, आनन्द गौतम, जीवन डंगोल, नरेशमान महर्जन, आशा श्रेष्ठ रौनियार, कृष्णमणि भट्टराईं थःथःगु धारणा तयादीगु खः । वइगु असार २५ गते खुक्वःगु बैठक च्वनेत्यंगु दुसा बैठकय् विधियोजन विधेयकयात कयाः सहलह जुइगु महानगरं न्ह्यथंगु दु ।
LEAVE YOUR COMMENTS