यातायात संघतय् ध्यबा सरकारयात वनीगु

येँ – यातायात व्यवसायीया नामं चायेकातःगु थीथी संघसंस्था वइगु आर्थिक दँनिसें खारेज जुइवं संस्थाया नामय् दुगु सम्पत्ति नं स्वतः सरकारया नामय् वनीगु जूगु दु । नेपाल यातायात व्यवसायी राष्ट्रिय महासंघ अन्तर्गत दुगु २४५ गू यातायात संस्था दर्ता जुयाच्वंगु खःसा आः उगु फुक्कं संस्थाया सम्पत्ति नं सरकारया नामय् वनीगु सम्भावना अप्वया वंगु खः ।

संस्था दर्ता ऐन २०३४ कथं व्यवसायीया बैंक खाताय् दुगु ध्यबा सरकारया नामय् राज्य कोषय् वनी । व्यवसायी संस्था दर्ता यानाः मुंकातःगु २ अर्ब स्वयां अप्वः ध्यबा थुकथं सरकारया नामय् वनेत्यंगु खः । ऐनया दफा १४य् विधान कथं ज्या याये मफयाः वा मेगु छुं कारणं संस्था विघटन जुलधाःसा अज्याःगु संस्थाया फुक्कं सम्पत्ति सरकारया नामय् वनी धकाः न्ह्यथनातःगु दु ।

व्यवसायीतय्सं धाःसा वइगु असार तकया दुने छुं लिच्वः पिकायेगु निंतिं सरकार लिसे खँ जुयाच्वंगु खँ धाःगु दु । नेपाल यातायात व्यवसायी राष्ट्रिय महासंघया वरिष्ठ उपाध्यक्ष ऐनकुमार शाहीं व्यवसायी व सरकारया दथुइ खँ जुयाच्वंगु कनादिसें धयादिल, ‘असार मसान्त तक छुं निकासा पिहां वइ जुइ, कम्पनी कथं दर्ता यानाः न्ह्याःवनेगु कथं सहलह जुयाच्वंगु दु ।’

मेखे यातायात विभागया कर्मचारीतय्सं नं सरकार व व्यवसायी दथुइ वार्ता जुयाः छुं सहमति यानाः खाता फुकुवा यायेफइगु खँ धाःगु दु । तर थ्व कानुनी लँपु मजूसें राजनीतिक निर्णय जुइगु खँ धाःगु दु ।