मंगल मा. वि. या शिक्षकयात ल्यापटप वितरण

किपू – थनया मंगल माध्यमिक विद्यालयया शिक्षकतय्त ल्यापटप वितरण याःगु दु । किपू नगरपालिका वडा नं १०स्थित विद्यालयया शिक्षकतय्त विद्यालयं ल्यापटप वितरण याःगु खः ।

विद्यालय व्यवस्थापन समितिया अध्यक्षलिसें किपू नगरपालिका वडा नं. १०या वडाअध्यक्ष अमन महर्जनया सभापतित्वय् जूगु ज्याझ्वय् वय्कलं हे ब्वनेकुथिया शिक्षकपिंत ल्यापटप वितरण यानादीगु खः । वंगु गुंपुन्हिकुन्हु जूगु छगू ज्याझ्वःया दथुइ व्यवस्थापन समितिपाखें ब्वनेकुथिया नीन्याम्ह शिक्षकयात ल्यापटप वितरण यानादीगु खः ।

शिक्षकतय्त ल्यापटप वितरण यानादिसें विद्यालय व्यवस्थापन समितिया अध्यक्षलिसें वडाअध्यक्ष महर्जनं ल्यापटप वितरणया मुख्य उद्देश्य ब्वनेकुथियात प्रविधिमैत्री वातावरणलिसे स्वाना यंकेगु खः धयादिल । लिसें वय्कलं विद्यालय व्यवस्थापन समितिं ल्यापटप बीगु जक ज्या याःगु खः धासें यदि ल्यापटप स्यन धाःसा उकियात दयेकेगु ज्या स्वयं शिक्षकया हे जुइगुलिं ध्यानपूर्वक चले यायेत नं इनाप यानादिल ।

ल्यापटप वितरणपाखें थौंकन्हय् भौतिक उपस्थितिइ कक्षा संचालन याये मफयाच्वंगु अवस्थाय् अनलाइन कक्षा संचालन यायेत ग्वाहालि जुइ धासें अनलाइन कक्षा संचालनया इलय् सुं नं विद्यार्थीं नकारात्मक ज्या याःगु खण्डय् अनलाइन कक्षापाखें चिइकेगु व टेरे मयासे नकारात्मक ज्या याना हे च्वन धाःसा विद्यालयपाखें लिकया छ्वयेत नं इनाप यानादिल ।

नगरपालिकापाखें स्वदँ न्ह्यः किपूया सामुदायिक ब्वनेकुथियात २५ गः डेस्कटप कम्प्युटर वितरण यानागु खँ कनादिसें उगु डेस्कटपपाखें अनलाइन कक्षा संचालन यायेत सहज मजुइगुलिं मंगल मा.वि.इ अनलाइन कक्षा व इन्टरनेटपाखें स्कुलया गतिविधिइ हिउपाः हयेगु ल्याखं भूमिका म्हितेत सकसितं मखुसां नीन्याम्हेसित ल्यापटप वितरण यानागु जानकारी नं बियादिल ।

प्रधानाध्यापक लोकलाल महर्जनं ब्वनेकुथियात प्रविधिमैत्री यायेगु उद्देश्यं शिक्षकयात ल्यापटप वितरण यानागु जानकारी बियादिल ।