पीप्यक्वःगु नेपालभाषा  साहित्य तःमुँज्या लामुगालय्

ख्वप(नेपालभाषा टाइम्स)÷ दँय्दसं कौलाथ्व द्वादशि व त्रयोदशि कुन्हु ख्वपय् पीप्यदँ न्ह्यःनिसें मदिक्क याना वयाच्वंगु नेपालभाषा साहित्य तःमुँज्या थुगुसी लामुगाः चौरय् जुइगु जूगु दु । नेपालभाषा साहित्य तःमुँज्याया मुँज्यां थुगु खँ क्वःछिउगु खः । शनिवाः ख्वपय् च्वंगु नेपालभाषा साहित्य तःमुँज्याया मुँज्यां वइगु कौलाथ्व द्वादशी व त्रयोदशी (असोज २८ व २९ गते) निन्हुयंकं ख्वपया पूर्वी लागाय् च्वंगु लामुगालय् पीप्यक्वःगु नेपालभाषा साहित्य तःमुँज्या यायेगु क्वःछिउगु खः ।

तःमुँज्याय् न्ह्यब्वइगु थीथी कथंया साहित्यिक व सांस्कृतिक विधाया तयारी व प्रशिक्षणया लागि थीथी साहित्यकार, कलाकार व संस्कृतिकःमितय् मुँज्या यानाः जिम्मेवारी बिउगु नं नेपालभाषा साहित्य तःमुँज्यां धाःगु दु । ख्वप नगरपालिका वडा नंं. ९ लामुगाः चौरय् न्हापांखुसि थुगुसी थुगु तःमुँज्या यायेत्यंगु खः ।

थ्वयां न्ह्यः थगुने यःसिंख्यलय् तःमुँज्या जूगु खः । उगु सम्मेलन ताःलाक न्ह्याकेत साहित्यकार, कलाकार, संस्कृतिकःमि व समाजसेवीतय् मुँज्या यानाः ग्वसाः खलः नीस्वनेगु तःमुँज्यां क्वःछिउगु दु ।